يدفتر كربله شكد تحمل احزان
يدفتر كربله شكد تحمل احزان
ومن اقراك الكه اجروح الحروف
الكه اول جرح بي الاكبر ينام
ويم الجسد ليله ادموعه اطوف
والكه القاسم بحناه عريس
دمه الحنه اديه والموت زافوف
والكه الجفل زينت ع النهر غاد
طايح ع الشريعه ومامش جفوف
بس لوعنده ادين ويلزم الكاع
جا وصل الماي لزينب زحوف
رغم ما عينه راحت يندل حسين
بعيون البصيره الكافل يشوف
وجرح عبدالله البكبر السموات
وحليب امه اعله نحره بدمه مديوف
عن سبط الرسول يصد الاسهام
من الخوف لاذ بركبته الخوف
وبعد ما سولفت عن فعل الاصحاب
الجدام ابن حيدر طاحو صفوف
واحد بعد واحد لحكو الموت
بكلب عاشك ركض ركضو ع الحتوف
عابس جن جنونه بعشك الحسين
وحبيب بشيبه ثلم حلك السيوف
وزهير الماعثر لا عثرت الكاع
وطاحت كلهه بس شالاهه الطفوف
وبرير القارئ الكل فعله قران
وجروحه اعله صدره ترتل ايات
وجون الاسس الخدمه للحسين
استرخص دماه وقدم الذات
نعم كلهم مناير لليتيهون
ونعم كلهم منابر للكرامات
ونزل بالطف حسين ورجفت الكاع
صح عطشان بس الذله هيهات
لبس درع المنيه واسرج الروح
وكام يسولف الدم مو خطابات
تلكه سهامهم ملكه المعازيب
مشابك والرماح بمنحره تبات
وحضن حته الخيول بصدره الحسين
ماداست جذب دس الروايات
اجت متعنيه للطف قاصده تزور
وتدري الشوك لليعبر مسافات
تهز شباج نحره وتطلب مراد
حقيقه ومقنعه ولتظن خرافات
طبروه النحر ماقصدو حسين
رادو موت دينك والرسالات
بس ضل الحسين وبقه التوحيد
وماتو كلهم ودين الله ما مات
ويا زينب حرت يم القرابين
عن صبرج شسولف والمصيبات
اول ما اجيت ارد اكتب اعليج
لكيت القلم خانكته العبارات
كتبت اه اعله زينب فوك السطور
كتبت فوك صدري احروفج اهات
اه اعله اليتامى بحضنج تلوع
تواسين الثجاله وبيج عبرات
طبيتي اليزيد ابمجلسه هناك
يا خدر العقيله شلون مأساة
استحت منج الكاع وسدت العين
تلــــــــــــوذ بعفتج حته العبايات
حجيتي ومن حجيتي انشكت احلوك
احد من السيوف وهنه جلمات
وبعد بالطف رقيه الشبكت الراس
طفوله ومنحر ودم اعله شيبات
اذن مو ثوره وحده بطف الحسين
بس موقفه هذا اعتبره ثورات
وبعدهي بكربله وبالدفتر احزان
بس خجلان شكتب من عبارات
القلم ما يكدر شما ينضم ابيات
يرسم لوحة الدم والمعاناة
رد مع اقتباس
المشاركة الأصلية كتبت بواسطة عراقيه وافتخر
