مسية العافية
هاي التحشيشة واقعية وآني احد ابرز ابطالها
حدثت في عام 2005
كنت في الحي الصناعي ابدل تايرات لسيارتي ووديتها للميزانية والبلنص
وصارت الساعة 12 ونص الظهر
ووياي صديق عزيز عليه
كتله : ابو وسيم خل نروح نتغدى اكو براس الشارع مطعم كلش زين
كال : يلا امشي
دخلنا للمطعم
وكان مطعم جبير وكله جامخانات بس اغلبهن متفلشات
لانه قبل فترة طكت مفخخة على الشارع العام القريب واتكسرن
كعدنا وطلبنا اكل
آني طلبت قوزي على تمن ويابسة
وصاحبي طلب كباب
بدينا ناكل ونسولف
وتدرون مطاعمنا من الهوسه ما تسمع شكو ماكو
فد شوية وجان يعيط فد واحد واكف بنص المطعم ولابس هدوم وسخه ولحيته طويلة
وبيده جهاز مال ريمونت
صاح : الله اكبر ... اليوم غداكم يم الرسول
وجانلك تتطشر الناس
وآني فلتت من الجامخانه الي بصفي وانبطحت بالكاع وخليت ايديه على راسي
وخطية فد واحد رجال كلش سمين وجان ياكل تشريب
طفر من الجامخانه وبيده ماعون التشريب
وجان ينجطل على وجهه ويصير راسه بالتشريب
فد دقيقتين ما صار الانفجار مال هذا المفخخ
رفعت راسي
لكيت الوادم كلها مجطله على الارصفة وخاله ايديها على روسها
وجان يكوم صاحب المطعم الي جان منجطل بذيج الصفحه
وينزع ( تكرمون ) حذاءه
ويستلم هذا الارهابي دك وين ما يوجعك
احنا كلناله - سلمة للشرطة يا معود لا يروح ينفجر علينا
كال : لا ماكو شي
وبعدين افتهمنا الفلم
كال الطباخ مال المطعم
- يا معودين هذا فد واحد نص ستاو (مخبل) كل يومية يجي نغديه ببلاش
واليوم آني طردته اشو ملعون الوالدين ما ادري منين راح جاب الريمونت واجه سوه سوايته هايه
طبعا الريمونت جان بس كشر وفارغ
وهذا المخبل راد ينتقم من صاحب المطعم وسوه هيج
ورعنا للمطعم لكينا الاكل كله متطشر بالكاع
والعمال بدو ينظفون وابو المطعم كال
- اخوان استريحو وراح ننزللكم غدا بمكان الى راح
بس احنا بعد من الفزة ما نشتهي
ورجعنا اخذنا سيارتنا ورحنا للبيت
رد مع اقتباس
شكرا ابو عبد الله
