تريد اكتب غزل وانساهه الهموم
وانه ويالغزل نافض كوامه
شكتب ياغزل واتغزل ابيش
يسيد خله سكته بلا ملامه
انه شاعر وجدك واملك احساس
واترف من جنح اترف حمامه
ويهزني الجمال الحيل مملوح
واطرب لو شفت بعض الوسامه
واسكر وانتشي بنظرات العيون
وتسحرني الشفايف بابتسامه
لكن وادري لكن سبب بلواي
ألمثلي الواجب يحسب كلامه
خصام ويالمره من كبل عشرين
فشك واسلاح يوميه انترامه
ما اكتب غزل صدكوني معذور
شمطب البيتنه تقوم القيامه
انه ماخذ ارهابي وعنده عبوات
بس يزعل علي ينسف حزامه
انه محتاج خطة امن للبيت
تطب البيتنه وتنزع الغامه
حتى اكتب شعر من صدك مرتاح
واوزع هاتفي وانشر ارقامه
لان موبايلي يوميه تفتيش
تشوفه عيون زرقاء اليمامه
شسولف ياغزل خلوني مهموم
ولو بعض الحجي يدمر ختامه
وره هاي القصيده راح تنلاص
كلتهه وبعد ما خاف الندامه
رد مع اقتباس