ألى ... ( صبر العراقيين , و عيون المحطات , وكلمات أمي , )
فتحت عين محطة ,, ودكَ جرس أول قطار
وخيّط عيون الكَمر خيط النهار
والحلم فز اعله غبشة .. يريد عين
تشوف كلشي ابيض مثل وجه الصبح مابيه سواد
يريد ضحكة
ضحكة عطشانة لشفايف
كون من تضحك تمر بيهه الشمس
تاخذ مراد .
والفجر جاب أعله متنة سنين تعبانات كلش جنهن أمي .
لكن أمي شويه احن ...
سنين ما عدهن حضن لفه اليتامه
ولا بجن من شافن الفلاح يبجي
وية الحمامة ..
وأمي ادفه من السنين بصوت يبني وداعت الله
بطاسة المآي التذب عيونهه وياهه من اروح
توصي بيه النسمة وعيون الدرب
تودي ضحكتهه ورآي ..
وترسم حجاياتهه بدربي فياي
يا سنين ... الترسن كَلوب المضايف بس ونين
ويا سنين ... المنعت حجايات شوكَ العاشكَين
ويا سنين الخلت جفوف الكرامة تنام , خاطر تحلم بجف الطحين
سنين ما شالن أدموع الرسمت أبخد أمي ديره
وهنّــــه ما شافن ظهرنة الشكَكَ أخيوط الحصيرة
واحنه ندري العيب وين
العيب بالطاحت خيمهم ..
العيــــب بالغضوا نظرهم
العيب مو بالباع هدمة العيب بالباعوا علمهم
ابجف صبرنه اليشرب من الكَصة ماي
أنذوّب الخوف المسح لون الشمس
بجف صبرنه الرسم أول قاعدة بحق الطيور التنحبس
وحكَ كل صفنة أبو بموسم العيد
وحكَ كل صرخة طفل لازم يكَول
كلشي أريد .أو. كلشي أريد
أرد أذب هدومي هاي وألبس الثوب الجديد
وحكَ حلاّت المدارس ... والمدارس
والسوالف بين ضحكات الصبح ويه النوارس ... والنوارس ,
الوطن .. لا مو شهيد
اليموت وما شرب ضحكة جهاله
هذا يتسمه شهيد
الفزع شال الصريفة وغطه عثكَ النخلة يتسمه شهيد
الينام بلا عشه يعني شهيد
والرسم وردة اعله بابه
يصير بيته أجمل مزار
واللي شاف عيون عطشانة لصبحهه
كون يشكَ الليل ويجيب نهار ,
الكَاع لو ما باست خدود المساحي
الشوك يطلع .. الشوكَ موت
الورد دنيا
الكَاع محتاجة لأبوها
تريده مره يحن عليها
ومن يحن ,, لازم يحن
مــــــــــــــــــــــــ ـــــــــــن يحن
كون روح مظفر النواب لازم تنسحن ,
حتى من تبجي الزغار
يسجل العيد بأسمهه ,
وحتى من ترجف يتامه
بلا غطا يجيبلهه صيف
وحتى يمسح ,, كلشي يمسح
يمسح اثار الوجوه الباقية بحضن الرصيف
وحتى يرسم ,, كلشي يرسم
يرسم اعله شفافهم كَرصة رغيف
وبعـــــــــــــد يـــــــرســــم
كون يرسم ظهر ابوهم شايل آثار النطاق
العاف روحه وشال خارطة العراق
راس ابوهم مشطة العوز بصباه
ومن سمع يوم الوطن رايدله روح ,, اتبرع بروحه ونطاه
يــــا وجه لون التعب دنيانه ليل
يـــا زنازين السجن دنيانه ليل
انطونّه شوية ضوه
والهوه بلا ريّه ما ينعد هوه
يم تراتيل المسيح نريد نعشكَ صوت اهلنه
وبكتر فيّ الشلب نزرع محنه ,
حتى نرجع من جديد
بدل ما نضغط زناد بجف وطنة, نسوي عيد ....
رد مع اقتباس
