دوس الورد و انته اتشوف عطر الورد ما ينداس
عطرك يضل بيك ايطوف يالـ ما شفت حنه و ياس
ليلة حنتك ذبلت وردتك عطر الورد ما ينداس
****************
من عطر وردك عطر جنة خلودك
ما خفو عطرك ترى الداسوا ورودك
انت ربك بيك يتباهى بسجودك
بيده راسم ع العرش لوحة وجودك
من داست خيل إعداك ** بيك العطر ضل فواح
و لـ هالزمن ضل وياك ** باقي العطر لا ما راح
ذبحوا فرحتك ليلة حنتك
*****************
عين ما شافت فرح ليلة فرحها
روح طارت قبل لا يكبر جنحها
شمس غابت بالفجر ويه صبحها
غيرة بأيام المحن غزر ملحها
نور النبوة الـ منطيك **هاي الصفه من الكرار
و الغيرة من صعدت بيك ** كتلتك يا بن الابرار
صعدت غيرتك ليلة حنتك عطر الورد ما ينداس
********************
النساء الكصن جفوف الـ نبيـهن
من جماله و فقدن بيوسف وعيهن
لو وكتهن طالع القاسم عليهن
جان كصن روسهن مو بس اديهن
هذا الجمال المكنون ** ما ينوجد بين الناس
من شفنه منهن بالكون ** وجهك اوجه العباس
حاظر زفتك ليلة حنتك عطر الورد ما ينداس
**********************
صورة من نور الحسن بالطف لكوها
بالسيوف املاك ربك صوروها
ع البقيع بغير حايط علكوها
و بالطفوف اهل المكارم ودعوها
صورة انت لك وسط العين **صورها داعي الإيمان
صوت الوحي دموع العين ** ايدها نور القرآن
نزلت اياتك ليلة حنتك عطر الورد ما ينداس
**************************
آني لو هسه بقلب زينب اشوفك
مستحيل اتحمل افراكك و اعوفك
شلون قدرت عمتك تحمل ضروفك
يا جرح مو بالسهل عاشكـ يروفك
يالغالي جرحك ما طاب**باقي بضمير الـ والاك
بالقلب نشتم عطاب**من سبب نار العاداك
ناحت عمتك ليلة حنتك عطر الورد ما ينداس
***********************
امك التاريخ واجب من يمرها
ينزل الرجلينها و يذكر صبرها
اني ما شايف مرة تقدم ذخرها
للمنيه و ينذبح زهرة عمرها
من زفتك لأرض الموت ** توفي الحسن ويه حسين
مهظومه و تنادي بصوت ** للغالي وفيت الدين
امك نادتك ليلة حنتك عطر الورد ما ينداس
**************************
كل شباب انشوفه نتذكر عذابك
اهوايه عدنه اورود ذبلت وي شبابك
لا حملناها و لا نحمل غيابك
بالمصاب مصابهم يشبه مصابك
دم الشباب المغدور **من طفك اليوم إنعاد
دمك و دمهم مهدور من الاجداد وأحفاد
غدروا شيعتك ليلة حنتك عطر الورد ما ينداس
*******************
ليلة حنتك 1436هـ
للشاعر : ناظم الحاشي .
الرادود : ملا باسم الكربلائي .
**************************
طبعت بأنامل العبد المذنب علاء 3laa
رد مع اقتباس
