هذي بت حامي الحمه و صارت غريبه
ها يفا دنيا هم بعد ضلت عجيبه
تحرسها الجناب لا مو بالحساب
************
ينضرب اروع مثل چان بخدرها
لو مشت خلف الولي حيدر ذخرها
و الحسن و الحسين و الثالث گمرها
چف ابو فاضل يضل يمسح اثرها
ما يخلي كل أثر يبقى لجدمها
و الهوى ما يگدر يحرك هدمها
هاي أم الحجاب لا مو بالحساب
**************
مدللت حيدر و لا واحد وصلها
ضلها چان محجب و محجوب ضلها
هسه يا وسفه الشمر يتباوعلها
تنهظم و تباوع لراس الكفلها
باليسر طول الدرب تتهامس الناس
عجبه زينب باليسر يتركها عباس
علمونا الاسباب لا مو بالحساب
***************
شابت و درب السبي يكسر ضلعها
و التراب إعلى الوجه غير وضعها
چم نهر أحمر رسم مجرى دمعها
و الصعوبه من تون شامت سمعها
هذا يشتمها و هذاك ايصد عليها
هيه من سوط النظر تشگف بديها
سوط النظر صاب لا مو بالحساب
**************
مزگو قرآن بأرض الغاضريه
و انرفع راسه برماح الجاهليه
زينب حجاب العرش راحت سبيه
انقلاب اعلى الرساله الاحمديه
زينب الوكلها الله بهـ المهمه
لو يزيد الينتصر لو تمحي اسمه
و ايصير الجواب لا مو بالحساب
***************
ما حسب هذي يزيد إبن الدعيه
ثورة ايتام بقيادة زينبيه
ترجف الفرسان من دمعة رقيه
زينب بكل خطوة چانت حيدريه
بچف عقيلة هاشم الرايه العظيمه
و العروش إنهارت بدمعة يتيمه
ناتجها المصاب لا مو بالحساب
**************
من تشوف أم الخدر رغم الرزايا
تلگه ابو فاضل بصفها و بيده رايه
و تلگه ذو الفقار وي زينب حمايه
خيم إجناح الوحي فوگ السبايه
و بسهوله يا شمر تلفظ إسمها
ما دريت بحيدره و كافلها يمها
من بعد الاحباب لا مو بالحساب
**************
روح ابو فاضل بقت تتبع ضعنها
ينسه گطع اچفوفه من ينظر متنها
دعوته يا رب بحق فاطم و ابنها
اختي زينب سالمه ردها لوطنها
يا ألهي بعهدتي اني جبتها
من عليها هاي الامانه اتكفلتها
فدوه هالرگاب لا مو بالحساب
***********
للشاعر : السيد عبد الخالق المحنه
قرأت في حسينية المرحوم داود العاشور ليلة ١٥ محرم١٤٣٧هـ بصوت باسم الكربلائي
************
طبعت بأنامل العبد المذنب علاء 3laa
رد مع اقتباس
