انه شاعر غزل وبصدري الالهام
وبقلمي الصور من تنرسم طوخ
واكدر بالشعر ارسم عله الماي
وبقافيتي اركب للهوى جروخ
بس يمك اللساني الباشط يبيج
لان راس السطر يم اسمك ايدوخ
حاججت الورد طلعته جذاب
الناسخ انته عدي وهوه منسوخ
قصر حسنك بنفسج سيجه الهيل
وقصر الجور يمك شو طلع كوخ
العنب من طرف شفتك حمّل اسلال
وبتفاح خدك ثيع الخوخ
ولان رمان صدرك تعب الزيج
شفت الراحه حدره بمشتهى تنوخ
انه من الناس كلبي اعليك تنور
وجمره بفيض حسنك دوم منفوخ
ادرخ بيك جن عدي امتحانات
واذا مريت انسه الجان مدروخ
انه امشي واغثن رية الكاع
واهيس ابمشيتك كل كاعنه تفوخ
يل طينتك تينه اندافت ابياس
وانه زهمول صرت ابعازة اللوخ
ارحم كلب عاشك تعبه الشوك
النضره الوحده منك بالف صاروخ
اذا كوجايه جنك حكك اتموع
والكبالك امجعمر جنه صلبوخ
للشاعر الراقي الدكتور فلاح الزيدي
رد مع اقتباس
