هنا

[3laa]

رحمة بالتشتم هواك إنظر التركض وراك
مو عليلة و بيه حيل ع السفر أكدر معاك
*******************
يالنويت اعلى الرحيل و انا اركضلك و انوح
من خذت كل الخوات بويه خاوتني الجروح
تدري مو سهل الوداع بعدك ابقى
بلايا روح حسين ثاني لو يصير گلي وينه و خل اروح
يا هي عدها بهالأنام ابو معصوم و إمام
وين إلاكيلك بديل و انت واحد لا سواك
''''''''''"""""""""""""
صحت بويه بعالي صوت لو عليله اشلون اصيح
و انا لو ما بيه حيل ما ركضت و جني ريح
كلشي ما بيه و تشوف لا يغرك من اطيح
عثرت جدمي العباة كمت بس جفي جريح
مو مهم جرح اليسيل فكر بجرح الدليل
هذا لو يحصل ضماد كلي شضمد هذاك
""""""""""""""""""""
حتى اثبت بالدليل علتي و المرض طاب
خذني اخدم بين ايديك بويه و امرك مستجاب
أحمل بجتفي الرضيع خلها ترتاح الرباب
لو يفز امن المنام اقره ايات الكتاب
اسهر بليلك هدوء و انا أجهزلك
وضوء
و بصلاة الليل اكوم و اندعي و اطلب رضاك
'''''''"""""""""""""""
اقسم بإسمي عليك و اليذكرك بالبتول
لا تخليني بعذاب بويه و اغيابك يطول
خذني راح اشافه بيك لو عليله اعليه تكول
الوردة لو ما بيها ماي بيها شسوي الذبول
شنهو اتنفس تريد و الهوى خذته بعيد
دنيتي من هالنهار بعيني ظلمه بلا ضواك
"""""""""""""""""
علم عندك خل يصير ترى أول ما تغيب
علتي ترد من جديد تبدي اعراض النحيب
و الوضع يصبح خطير سكتتي و موتي قريب
تعرف العله و دواي و اللي ما ايعرفه الطبيب
اسم هالعله حنين و الدوه اسمه حسين
شوكي ما يجامل حياة شكد سهل عنده الهلاك
""""""""""""""""""
خاطرك ادري كسير لا ازيدك انكسار
شوف اللي اتحتم عليك الك راجع هالقرار
امري لله من تروح شبيدي غير الانتظار
و المدينه الجنه بيك اشستغفر الله جنه نار
لو ان ما قبر الحبيب هالوطن يصبح غريب
ضيكت صدر السماء و الارض تبجي بخطاك
""""""""""""""""""""
قلبي ما ادري شجاه ايكلي هذا أخر لقاء
بس يردد ست حروف وحدة اسمها كربلاء
علينه لو ويانه هاي ليش احس كلها دماء
تذبح من اهلي رجال بالسبي تبعث نساء
احساسي أتمنى يجيب ماگو مسبية و خضيب
عمتي ترد بوقار عمي بيده ايرف لواء
""""""""""""""""""""""
إوداعت الله يالمشيت بعد ما اضنك تعود
الوعد يصير بويه بجنان االخلود
ياهو يسبك بالممات تنحفر لأجله اللحود
اليوصل أول للجنان يهدي للثاني ورود
عكب احلامي و طيوف تالي تجمعنه الحتوف
نلتگي و اهناك اكول ع السفر أگدر معاك
""""""""""""""""
للشاعر : علي السقاي
قرأت في حسينية داود العاشور ليلة ٣ محرم ١٤٣٧ بصوت خادم المنبر الملا باسم الكربلائي
""""""""""""""
طبعت بأنامل العبد المذنب علاء- 3laa

[يوجين]

شكرا جزيلا للطرح
مأجورين ان شاء لله

[Ali Ibrahim]

في ميزان حسناتك ان شاء الله

[ولاية علي]

احسنت اخي