تعال تعال ما ترمش اعيونه الفكد غالي
تعال تعال مثل اليمد جفه و يرد خالي
&&&&&&&&&&&&&&&
جم تعال و جم دخيلك من عفتني
يلخذت كلشي برحيلك ما خذتني
ليش بجفوف النوايب سلمتني
خايف إعليه أموت و موتتني
عتاب عتاب أنا البدايه و أصبحت تالي
تعال تعال مثل اليمد جفه و يرد خالي
""""""""""""""""""""""""
بوية اتعجب تخلص الليل وحدك
و انته متعود اجي و اغفه اعله زندك
ما اتعبك بالدرب بويه اوعدك
يعني تاخذني ولو خدام عندك
عذاب عذاب ما يحمل افراك و سهر حالي
تعال تعال مثل اليمد جفه و يرد خالي
"""""""""""""""""""""
بويه داري اخلاف زينب شلي بيها
جنت مثل الطير اشرب من ايديها
إعليك ضلع إمك اريد إتمر عليه
مدري ليش ابصفنتي اسمع بجيه
دموع دموع مثل الجمر من الجفن سالي
تعال تعال مثل اليمد جفه و يرد خالي
""""""""""""""""""""""
مدري ليش اختي رقيه إحمر جفنها
إصورتها خايفة و مجروحه اذنها
بالحلم جنها تعيش ابلا وطنها
إبلايا جفينه ابو فاضل دفنها
يموت يموت إلمن يعيش إلي فگد والي
تعال تعال مثل اليمد جفه و يرد خالي
"""""""""""""""""""""""""
بويه شو بالطيف جني بگاع هيمه
زينب اتصلي جلوس ابلايا خيمه
بوية و الميمون يصهل يا هظيمه
و اليتيمه اتلوذ بلياذ اليتيمه
حسين حسين مهرك ينادي و الدمع هالي
تعال تعال مثل اليمد جفه و يرد خالي
""""""""""""""""""""""""
بويه عبدالله يدوهني إمن اشوفه
وضعه يرعبني و افز و بيه خوفه
يفتح اگماطه و شفت دم بجفوفه
انت ضامي و الطفل ضامي تعوفه
وداع وداع وضع الطفل بويه شده بالي
تعال تعال مثل اليمد جفه و يرد خالي
""""""""""""""""""'""""
تالي ما تالي نعى ناعي الرزيه
گال الحسين انذبح بالغاضريه
تلعب الخيل اعلى صدره ابن الزجيه
يا أهل يثرب ترى زينب سبيه
يكول يكول راس الحبيب اعلي الرمح عالي
تعال تعال مثل اليمد جفه و يرد خالي
""""""""""""""""""""""
للشاعر : عبد الخالق المحنه
قرأت بحسينية داود العاشور ليلة ٣ محرم ١٤٣٧ هجريه بصوت الرادود ملا باسم الكربلائي
"""""""""""""""""""
طبعت بأنامل العبد المذب علاء
٤/محرم/١٤٣٧
رد مع اقتباس
المشاركة الأصلية كتبت بواسطة اميرالفتلاوي
