ادعــي يـالله طــول عمــري ** حـتى من اللطم يشـبع صدري
خـاف امـوت وانـحرم
امن المجالس واللطم يـربـي
------------------------
يا أللهي .. انـتـه تـدري بحـالي
يا أللهي .. حسين عـندي الغالي
والله كـل غايتـي بـس يرضـه عليه
خـاف ماراضـي وتـوافـيني المـنيه
لـو ردت الـطم بگـبري شلـون بـيه
وربَـطـونـي وبالچـفـن شـدو اديـه
الدمع مايطلع اتراب ابعيني ** وانـه متـعود اون لحسيني
ابچـي لازم وانهـظم
امن المجالس واللطم يـربـي
------------------------
هذا حالي .. مـا امـل مـن نوحي
هذا حالي .. الحـد متـطلع روحي
ربـي لـو عمري جـزه احـدوده وتـقدم
امهلني بس هـاي السنه ايخـلص محرم
اسنيـن الطـم ماطـلع مـن هالصدر دم
بلـكي لـن هـاي السنه صدري ايـتهدم
انچان صوت اللطمه مامسموعه ** ارد اهـدم هالـصدر وظـلوعه
انــي لامـا منـفطم
امن المجالس واللطم يـربـي
------------------------
انته تدري .. مــاتـكـفـي ايامـي
انته تدري .. للمـجالـس ظــامـي
ابكـثر عـمر اشعيب ربي عـمري اريده
يـاله ايـكفيـني ابچـي الخـنـصر ايــده
اشـكم قصيده ايريدلي وشـكم قـصيده
وچـم عـمر لوردت ابچـي الـحز وريده
حسين روحي وما امل من روحي ** اجروحه بيه شلون انسه اجروحي
ولو نسيت انـه انلچم
امن المجالس واللطم يـربـي
------------------------
بالقيامه .. بشـخصه لـو دلوني
بالقيامه .. مـن تشوفه اعيوني
هــل مـن المعـقول يتـقـبلني هــوه
وخـدي مـن دمـع المـجالس مـاتـروه
اعـترف منـي جـراءه وهـذي قـسوه
ويـن اودي وجـهي مـن حسين بـلوه
ربي وفقني السنه الهذي المجالس ** حتى يوم الحشر الطم ويه عابس
وعطر ابو اليمه اشم
امن المجالس واللطم يـربـي
------------------------
امنياتي .. مـوتي يـوم العاشر
امنياتي .. مـن اطــب للحـايـر
ابـركـضه اطـويريـج وبـنـص اليـعزون
كون اطيح وعلى صدري الكل يسحگون
كـون ياربي ابـظريحه اتغـمض الـعيون
بلكي يحسبني الحسين اويـه اليلطمون
عمري ما اطلب يربي اتزيده ** لـو رضه حسين العمر ماريده
ريـته يـمــه ينحسم
امن المجالس واللطم يـربـي -
-----------------------
ربي ربي .. بحالي انـته الـداري
ربي ربي .. بلـكي تـخـمد نـاري
لـو لطـمت اعـله الصدر بـيديه الاثنـين
بلـكي هـذا اللطم يـطفي نـار الحسين
بلـكي يحسبني الحسين اويـه المعـزين
من يشوف ابخدي طبـعت دمـعة العـين
هاي هـيه غايـتي وهالغـايه ** اجـي يوم الحشـر شايل رايه
ابرايتـي كاتـب اسم
امن المجالس واللطم يـربـي
------------------------
تمت والحمد لله
١٦/ ٧/ ٢٠١٥
خادم الحسين حيدر تركي الكربلائي
رد مع اقتباس
المشاركة الأصلية كتبت بواسطة حسن الياسري
