مـو علـيـله ** هـمي اشـيله
اوياكم اخذوني تراني موعليله
----------------------------
اوياكم امـشي اولا تخـلوني اعاني
بـيه مـن ترحـون مايــرحم زمـاني
مـا اظـن احتمـل فرگتـكم تــراني
امنين احصل لي بهجركم گلب ثاني
لـو رحلتو ** مـوتي جبتو
الفرگه يهلي لاتظنوها قليله
-------------------------
يالنويــتو الهـجر لرض الغـــاظريه
اخـذوني يهلـي مثـل ماخذتو رقيه
حـتـى اواسـيها اذا راحـت ســبيه
وعلى راس الابو انموت احنه سويه
الحل سكوته ** حـان موته
وانه ميته الابو من قرر رحيله
-------------------------
ردت اسئل يهلي والمـدمع ازيـده
هـاي مو ويــاكم اتهــاجر حـميده
ويـن عـمي ابو فــاظل انـه اريده
اقسـم اعـليــه لايخـليني وحــيده
شوف همـي ** هــا يعــمي
ماكسر گلبك دمع عيني الاسيله
-------------------------
شلون ترضون ابقه وحدي ابلايه والي
والله وحـشه بغــيركم يهــلي الليالي
مـو صـعب ويــاكم ايـصير ارتــحالي
بـس صعب مشغـول يبـقه والله بالي
الظعن ساير ** وفكري حاير
لو رحلتو ياهو بتـكم تلتجـيله
-------------------------
يهـلي يالـناويـن انـتو بهالمـسيره
اشلون تبـقه ابداركم طـفله زغيره
الروحه گلتولي خطيره مـو خطيره
اعليه خفتــو لا اروح انــه اسـيره
خـــل اسافـر ** صعــبه باچـــر
ابقه وحدي ابداري مكسوره وذليله
-------------------------
وين ابوي حسين اريد اليوم احلـفه
گلبي مابيه يحتمــل هجرك تعـرفه
على فراگك دمع عيني مـن ينشفه
وسـفه اظل ابداركم يابــويه وسفه
لــو تـودني ** اوياك اخذني
بويه دلالي منو ايسكت عويله
-------------------------
اويـاكم اخـدوها العـليله يالامــاجد
اهنا اموت اهناك اموت الموت واحد
الوجه ابويه حتى كل لـحظه اشاهد
گـبل ماللـموت عـن عيـني يــباعد
ليــه نــدائي ** وبــدمــائي
ايعود سالم انه كل لحظه اندعيله
-------------------------
تمت والحمد لله
في ٣١/ ٨/ ٢٠١٣
خادم الحسين حيدر تركي الكربلائي
رد مع اقتباس
المشاركة الأصلية كتبت بواسطة اوسو$
