العراقيات الاوليات نسوان قبل اللي ربن وتعبن وسون بيوت چان عدهن ولع بمواعين الالفي ورميو وجوليت وسيتات الكلاصات والإستكانات وخواشيگ الچاي المذهبه ،،
كل هذه چان الها مكان تنضم بيه وما تطلع بس للخطار ،، مكانها المقدس هو البوفيه .
امهاتنه قبل ،، ينگلن من الاورزدي والدلالات وكلها بخت البوفيه .
يمه المن جايبتهن .. هذه المن ضامتهن !!
يمه هذه للخطار .
أبو العائله يچد ويتعب ،، والمره تضم للخطار .
ابو البيت والعائله السنه كلها مگضيها يشربون چاي بگلاصات الجبن ..
والإستكانات والخواشيگ المذهبه للخطار ..
كوابة الحليب نصها طايره اذانها .. وسيتات الحليب ام الحفر والنقش بالبوفيه للخطار .
ظلت بوفيات بيوتنه مليانه بالغالي والنفيس والاصلي للخطار .
وظلت المناشف والخاوليات الزينه للخطار .. وظل كلشي عزيز مضموم للخطار ..
تالي يايمه بوفياتنه ظلت وحدها حزينة دار .. وظل هذاك بيت ابونه خالي من الهلا ومن الخطار .. ما ننتظر بعد خطار .. اغراب صرنه بهل البلد حسبونه على الخطار .. أگلچ يايمه صبيلنه بإستكانات الذهب .. تگليلي هذه الكم ذخر تاخذوها وانتوا كبار ... وصرنه كبار .. وعلواه ما صرنه كبار .. شيصير لو يرد بينا الوگت .. ملومين ونبقى صغار ،، ملعون هذا الزمن من خلانه طشار ،، هيچ ولك طبعك عوج ،، هيج طلعت غدار ،، الله أكبر عالظلم سوانه كومة حطب مشتعله بيه النار ،،
ونرد للدار .. وينها الدار !!!
وين بيت الطفوله الودعنه بيه گومه اسرار ،، وين نومة السطح بصيفنه ذاك الحار .. وين بردات الصبح تجفلنه واحنه صغار ،، وين فزعات الاخو لو دار الزمان وجار ،، شنهو الصار !!!!
معقوله بلد الكرامه صفه مابيه ناس اطهار !!
معقوله بلد الأئمه محكوم بيد اشرار !!
معقوله حاكمنه قبل هم عار وهم افرار !!
معقوله حامي الوطن يطلع حرامي الدار !!
إذن معروف منين جانه الغدر ،، وخلي الدم بينا انهار ؟
من گالووو اهلنه قبل .. شوف الجار قبل الدار .
ومن ردت جديتي بمثل .. كون كوم حجار ولا هالجار .
وخطاااار عدنه الفرح نعلگ صواني شموع .. حالف مايمر الوطن ،، كله حزن ودموع .
رد مع اقتباس
