درر العراق

علي الشمري · 4/October/2015

مجموعة دارميات بقلمي منها من كان رد على دارمي
ومنها من هو منفصل تمت كتابتها في موضوع (اصحاب الاقلام)
احببت ان اضعها بموضوع منفصل
شكرا لكل من سيمر من هنا

............................................

من الله هالتنصيب نــــزله ايه
بس العلي الكرار تحله الولايه

يا ابو الحسن هاليوم مشتاك اشمك
واتمنه خـــــــادم كــــون تقبلني يمك

لاتخضــــع لدنياك بالك تطــــخ راس
صدكني كلشي ايهون بس انخه عباس

حبك يداحي الباب عالفطره بينه
من الازل مكتــوب حبك علينه

حبك سكن بالروح ظل شاده العين
ماينمنحي وميزول صدك يبو حسين

مو ثــــار الك ثارات بكليبي خليت
لمن طحت مسموم ياصادق البيت

محجوزه الك هالروح ماتهوه غيرك
تزعل تريد اتروح انته وضميرك

احطني اعله بالك دوم لاتنسه طرواي
واذكــــــــــر الطيباب بالعِشـــره وياي

نارك يبعد الروح طرتهه لحشاي
ماتطفه يالمحبوب اله انته وياي

طيب واعرفك زين ماتنسه فد يوم
ياخويه بس مرات تلهينه الهمـــوم

طرتني طر دنيايي وبلايه تفكير
ازرع ورد ويروح محصولي للغير ؟

صافن انه امن اسنين صدكني محتار
كاعد واتاني اتعود ومكـــــــابل الدار

سهران افكر بيك ماشايف النوم
وتخيلت مرسوم وجهك بالنجوم

طكني الدهر جيلات كلش كصه اوياي
بظيم وقهر واهموم راوتني دنياي

بضلوعي شبت نار من فاركتني
اوصار الكلب طشار لمن عفتني

بضلوعي شبت نار ماتقبل اتهيد
ماتطفه يالمحبوب جي لنك ابعيد

ثق واعتقد اهواك كمت انه اهم بيك
صبح وعصر يهواي ماناسي طاريك

طيب وكرم واخلاق ربك وضع بيك
ادعي الله صبح وليل سالم يخليك

يكتــــــل كتل فركاك خلاني حاير
اشتعل واطفه ابساع مثل الجكاير

كل الجروح اتهيد بس جرح الفراك
يشلع شلع بالروح من الكم اشتاك

ارد اسأل العشـــــــاك ويه اليحبون
ليش التوافي اوياه هم يرجع ايخون ؟؟

حجيــــــــك مردلي الروح زيدلي نوحي
ادعي الله واهل البيت ياخذهه روحي

بسك هجر ياصاح بسك تجافي
شنهو الجنيته اوياك يالما توافي ؟

وكتك يخويه ادريه كلش كصه اوياك
بس الكلب والروح تتمنه ملكاك

انخاني وكت الضيج تلكاني حاظر
متحزم اعله الموت وبعيني ناظر

حس بيه خاب اشبيك مو تدري اهواك
مثل النفس بالروح ما اكدر انساك

واهمداه الروح واهمداهه ...
خبزه وفقير اليوم يركض وراهه

كامت تهل ادموع عيني وتصب دم
لمن رحت يهواي ظل ساكن الهم

نار وتشب بحشاي ماظنهه تكعد
شيطفي نار الشوك يل عنهه مبعد

ظلمه ودرب عاثور واتعنـــــه لهلك
واعبرهن الصعبات ماخافن اهلك

ظلمه ودرب عاثور واتعنه للـــدار
درجعلي يالمحبوب صار الكلب نار

ظلمه ودرب عاثور واتمنه امر بيك
واعبرهن الصعبات بس كون الاكيك

خلني اعله بالك دوم لاتنسه طرواي
واذكر الطيبات بالعِشرة وياي

تيزاب احط بالعين وعميهه فد نوب
خافن تصد للغير ودير الكلوب

اخ اشكثر ع الاخ متعلمه روحي
لاترضه تهده ابيوم لايطفه نوحي

زين انته من حطيت فاله ابوسط عين
رشيت انه التيزاب بعيوني الاثنين

تبجي وتنوح اعليك ما نامت ابيوم
روحي وتظل تهواك صدكني للدوم

مشتاك اشوف اليوم ولفي واريده
وارجع عدل تدرون من المس ايده

هم وقهر وفراك كلهن صفن بيك
ياكلبي يامكرود محد يوافيك ؟؟

رد ليه يالمحبوب خل نحسب احساب
مرت سنة وسنين ومكابل الباب

واكف حبيب الروح يم عتبة الباب ؟؟
ماتدري هزني الشوك بيك الكلب ذاااب ؟؟؟

بسك حبيب الروح طولت الفراك
تدري الكلب مجبور كل ساعه يشتاك

خوة وصفت هاليوم خوة مصالح
شنهو السبب بالزاد ماضنه مالح ؟؟

صافن واظل اسنين بالصفنه هايه
ومخبل ومجنون صاحو ورايه

صافن وافكر بيك واتخيلك جاي
ومكاود انه اوياك تتماشه وياي

كـــــونك هلك منعــوك تتماشه وياي ؟
ضيعو تعب الليل وي سهري ورباي

ضيعت كل دنياي من فاركتني
وانعمت حته العين لمن عفتني

جرحين الك بالروح صدكني شايل
جرح الهجر وفراك ويه الرسايل

لا جرح لا جرحين لا اربع اجروح
خليتي بالدلال وياهه بالروح

كل ساعه افكر بيك كل ساعه اهم بيك
وين الله كون الكاك واكعد واحاجيك

جنت اسهر امن اشتاك ومخلص الليل
بطلت مابياش ماظــــــل بعـــــــد حيل

من كلبج اتكولين عد الله الف باب
ماظل حجي النحجيه بطلنه العتاب

تبجي وتهل ادموع عيني ابغيابك
والكلب ويه الروح تربي اعله بابك

خوتنه انه اوياك موش اضحك او روح
خوة ابوسط روحين يعني انته بالروح

خوتنه انه اوياك ماتنمحي ابيوم
نعبرهن الصعبات ونزيح الهموم

يا ضاوي كلشي يموت صدكني ويروح
بس الصديج الزين ظل ساكن الروح

طكاني وكت العوز كمت انشد اصحاب
محد وصلني ابيوم يم عتبة الباب

اجمل مساء الخير لعيونك اهديك
وادعي الله صبح وليل سالم يخليك

لو تركض اشمتريد ماتلحك ابيوم
دنية انبنت يفلان صدك بالهموم

جلجلت عيني اعليك شو مثل الغيوم
وزخت مطر حسرات صدكني بهموم

مجنونه روحي اعليك صدكني تهواك
تصرخ صريخ ايتام ماترضه تنساك

فز كلبي نص الليل ينشدني عنك
مامش خبر مرسال يوصلني منك ؟

اخ اشكثر ع الاه متعلمه هالروح
تبجي وتون بالليل وتهيج الاجروح

ماعدي حظ وياك وانه اعرف ابهاي
اتعب واشوف اعداي تحصد ثمر جاي

ماظل حجي ونحجيه كلشي انته وراح
حته النظر بالعين صدكني هم شاح

انطــــــــر واتاني اتعود يايمه اليه
وجني انتظر الهلال يوم المسيه

حافي ولفاني الظيم وجـــــروحي متهيد
كون الكه خبزه اليوم حته انطر العيد

راح اكتب المرسال وابعثهه وي طير
كل لحظه مو كل عام وايامج ابخير

مكتوب الك وديت يالساكن اهناك
للناصـــــــــريه اليوم جاك اوتعناك

اتمنه طير اتصير روحي اوتجيكم
وتحط على الحيطان تسمع حجيكم

يخزرني من ايفوت نظراته تكتل
ياعمي عده اعيون صدكني تنتل

نظره وخزرني ابهيـــــد وارتجفت اعضاي
وجن السما اعله الكاع وانطبكت اوياي

مر بيه خاب اشبيك عيد الله هاليوم
مو تدري من فركاك ماشايف النوم

اسف يبعد الروح كل قصدي اشاقيك
احركة روحي اليوم بس كون اراضيك

وي روحي اشوفك دوم صدكني ولهان
ابنص الكلب موجود يعني انته شريان

كل لحظه افكر بيك كل ساعه كل يوم
صار اشكثر يهواي ماضايك النوم

ظلمه ودرب عاثور وانتظرك اتعود ....
كاعد وافكر بيك واخرط بالخدود

علي الشمري