علي كَالوا بعد ما يكتب هواي
وانه اشما طيح اشبــّن اوكَف وكَوف
چذب لليل ادنكـــَ والصبح جاي
والمزوكــَ المشاير سنبله زلوف
صدح طير الجبال بطــور معناي
واخذ مني الغنه بالهور مشحوف
وطرب شرجي السماوه النغمه اصباي
وعشكــَ تالي العمر والبعده ملهوف
يضوكــَ اليطي خده الشفة اغناي
حلاوة طيبتي وولايتي تشوف
صبغ وجها الغلبني وحصل بهاي
ونزع صبرة وتمكمش ذلتة بخوف
صبغ جلمه ايعرفهه ايريد شراي
مثل راعي الهرافي اليصبغ الصوف
انه وشعري وحبيبي بهاي دنياي
يجن مغزل ذهب وبريسم يروف
انه الشوكــَ الترضعه حچايتي وياي
مثل شوكـــَ الغزاله الترضع خشوف
يريدوني نخـــــــل ما يكسر فياي
يريدوني فــــــرح ويكَابح دفوف
انه بياهي اصير اركـــــض لبلواي
واظل سندان صيني الورد الحروف
انه بهيمه وكلت ما ابيع ممشاي
على امباوس چذب ومصافح چفوف
كَشت بير الغميج وغرفــــن ادلاي
واهب الكل ضوه وراكَي اعله الچتوف
مهي الشالت عنكَهه بجيحـــــة الماي
اذا ينشف تلمـــّه وتزحــــف زحوف
واذا صــــوت الغــــراب يعــّير الناي
بعد حكَه الكَصب مــــن يثلم سيوف
بعد حكَه الكَصب مــــن يثلم سيوف
للكبير محسن الخياط _ السماوة
كُتبت في بداية الثمانينات
رد مع اقتباس
المشاركة الأصلية كتبت بواسطة sarah sona
