للذكرى فقط...
مري بيه عيون خرسه..
مري بيه دموع وكحه..
مري بيه ظنون تشنقني الصبح بين الدروب..
مري بيه حروف عمية
لشاعر إعلى الماكو عمره..
لشاعر برقة حديثة
بلا سبب يطفة ويذوب..
مري استري دموع عيني..
دموعي تمشي اعلى الخدود بلايه ثوب..
مري بيه نجوم تبچي!!
وديره مستاحش ضواها..
ونهر طعناتة بجروفه ويبدي ونه من الغروب وللغروب..
مري بيه سنين صغري الضاعت بديرة عيونج..
والبقه من سنين عمري
تراب منثور إعلى چفچ..
وانتِ طشيني إعلى
گاع الما جدح بيها حنين..
مري بيه وخل ارسمج بالخيال
بفكر شاعر صوره من طعم العسل
واشربها يوميه الصبح ويه الونين..
مري بيه سنين عمري بلايه
طولج مو سنين!!
مري بيه العين مشتاگه لدلالچ
والدمع مل الركود!!
يريد يطفح موج شوگ وياخذ سنيني بسفينة..
اي وين رحتي؟!
اخذي دينج گله مني!!
اخذي روحي ليش روحي
بلا سبب يمي رهينه؟!
مري بيه طيور بيضه
ونورس يدور إعلى ديرتنا الحزينه..
الشوراع دمع گحلة
وتنشغ شفاف المدينه..
مري بيه وأخذي روحي أبين دمعچ..
نهر مديني إعلى خدچ..
عاف روحه وضيع جروفه وطريقة..
مري بيه انسان فاشل!!
گضه عمره يحب خيالج وانتِ محبوبة صديقة..
مري بيه انسان ضايع
رسم وجهچ على الخيال
وضاع ما بين الوهم بين الحقيقه..
مري بيه الدنيا لبست ثوب ليل..
وضيعت ثياب النهار..
مري لحظة عشگ مشموره اعلى باب
حتى اعوف گبور بدر
واحفظ ابيات لنزار..
مري بيه الصبح يبچي بلايه شوفچ..
مري بيه الظهر خانگتة بچفوفچ..
مري بيه الليل صافن..
خال خده إعلى الغروب وينتظر حلة زلوفچ..
وانتِ يا تؤام حياتي!!
گبالي عازلها بجساره..
ويله انتِ شويه من خجل العذارى..
وحطي راسچ بالتراب..
شوفي واحد جوه روحج فاك من ضلوعه باب!!
وگلبي متشظي أعلى زلفج!!
گضه عمره من الصغر عاشگ سراب..
مري اول بسمه چذابه اعلى شفتي!!
مري اول نسمه چذابه اعلى صدري!!
مري اول فرحه چذابه اعلى عمري!!
وفرحي عمري اليتّمته سنين صدچ.
فرحي روحي بآخر سنين العمر..
خليني امشي إعلى الگبر فرحان بعدچ.
رد مع اقتباس
المشاركة الأصلية كتبت بواسطة أوراق شاعر
