هنا

[Ba8iR]

انت طالب سادس؟
نجحت للسادس؟ لو عايد؟
أتريد بس نجاح من السادس؟ لو معدل مقبول؟ لو عالي؟
خلي اجابة أبالك، وكمل قراية..
،
،
،
،
،
-السادس عدنا بالعراق مسوي الناس شي صعب وشي جبير
-أكيد، ﻷن هو أصلاً شي صعب وجبير ومهم
-ﻻ السادس مو صعب بس الناس تسوي صعب ع الطلاب!
-شلون يعني؟
-شوف.. هسه أنت طالب سادس، أفرض أجوك ناس تعرفهم أصدقاء وأقارب من راح يسمعون بيك طالب سادس، راح يكلولك "الله يعينك" و"خطيه" وينقهرون عليك، وﻻ كأنما طالب سادس كأنما رايح للحرب!
هذا الكلام راح يخليك تتخيل السادس كأنو شي مرعب، او كابوس، او تعب ، وشي مهم يحدد حياتك الجاية كولها، هذه الامور راح تخوفك من السادس
- بعد أحسن، ﻷن من تخاف راح تقره أكثر وتجتهد أكثر
-ﻻ، أغلب المرات راح تكون النتيجة عكسية ، يعني راح تضغط ع نفسك أكثر -مثل مصار وياي- وبالاخير راح تتعب، ومراح تقره
ﻷن صدكًني كل ضغط يولد بالنهاية إنفجار،


اخواني.. الناس مسوين السادس فدشي ومضخمينه حيل، وتره التضخيم هو احد أسباب الضغوط غير ضرورية ع الطالب، وهاي الضغوط بالنهاية يكون الها سبب سلبي مو إيجابي مثل ميعتقد الاغلب
(إذا وضعت أحداً فوق قدره فتوقع منه أن يضعك دون قدرك) وهذا قانون ثابت
السادس -ومثل ميعرف الطلاب اللي مرو بي- امتحان نفسي اكثر مما هو اختبار بالكيميا والفيزيا والاحياء، يعني امتحان نفسي بينك وبين نفسك.
كولنا سامعين بطلاب جانو شطار وعدهم إعفاءات قبل السادس، بس من وصلو السادس نزلت درجاتهم! شنو السبب؟
السبب مو ﻷن المواد صعبه، ﻻ أبداً، حتى لو كانت المواد عندك وقت كولش هواي كافي تكملهه وتضبطهه، بس يا ترى هل راح تستغل هالوقت؟ هذا هو الامتحان النفسي الي احجي عليه.
اللي ان شاء الله بتدوينات ومواضيع جايه راح اساعدكم بي
ان شاء الله راح استمر بنشر تدوينات تساعد طلاب السادس للاستعداد النفسي وكذلك تدوينات تساعدكم بدروسكم
من مواضيع تهم طالب السادس في كيفية القراية ونصائح مهمة جدا راح تفيدكم كطلاب خلال السنة الدراسية كولها
كذلك دروس ومرشحات وطرق مختصرة حصريا(يعني ممنشورة بكروب او صفحة ثانية)
وهذه الطرق المختصرة لو اني مبتكرهه او سامعهه او قاريهه بملزمة معينة
بالاضافة الى شروحات بطريقة سهلة وتلخيصات للمواد (التلخيصات راح تغنيك عن الكتاب وتكدر تقارنهه بالكتاب وتشوفهه مضبوطة 100%)، بالاضافة الى ذلك راح اقدملكم شروح تقسيم الدرجة حتى تعرفون شنو المهم، وكذلك الطلاب اللي يريدون بس نجاح راح تفيدهم جداً.
وان شاء الله راح تستفادون

مدونة فكرة عراقية، زورونا على الرابط