{قصيدة الوزير}
...........
گلي شغلك
گتله سايق بالسفاره
واشتغل بس ع السكاره
گلي ضيف
گتله آنه صدگني نضيف
آنه شغلي بالاثاث
أبد ما أسوي كراسي للعريس
آنه بس أصنع كراسي
للوزير وللرأيس
أحلف آنه بالطلاگ
أحلف آنه بالثلاث
آنه ماعندي أرتباط
طلع شاملني أجتثاث
وعندي هم طلعت أضباره
گلي عنوانك ورقمك
گتله بحي التنك
بآخر عماره
گلي وصفك
گتله أملح
گلي وضح بعد أوضح
گتله بلون الصفو
براس الجگاره
كلي أسمك
كتله مكتوب
بسجل آخر نضاره
گلي بايگ مختلس
مزور شهاده من التجاره
گتله ممكن بعد أذنك
بس علي عيد العباره
گلي=. ها...؟
وهزلي راسه
وگال فاهم بالاشاره
گالي =....آنه موافق
راح أقبلك بالتوافق
انته بارع بالاداره
تصلح أتدير الوزاره
.......
كلمات
ناصر اسماعيل الموزاني