اكثر اللي يحاول يقنع الاخرين بالبقاء بالعراق يكرر مثل او مقولة (( الوطن مو فندق اذا ساءت الخدمة تغادر ..))
ماشي نعتبره فندق ونشوف مواصفاته هل فعلا خدماته سيئة والناس تغادر الفندق علمود الخدمة سيئة
عيوني انتو الناس تغادر الفندق وتطفر من الشبابيك والبلكونات حاليا وتخاطر انه توكع وتنكسر رقابهم مو بسبب الاكل ما بي ملح ..لو الشوربة اللي يقدمها الفندق باردة لو الكيك مالتكم ما بي كريم كفاية ..لا ..الناس تغادر الفندق لاسباب هواية :
_الفندق مالتكم بي طوابق مشتعلة بيها النار وادارة الفندق ما تستخدم رجال اطفاء وانما يبصقون على النار حتى تطفى ..وما تعرف شوكت توصل النار لغرفتك وتشويك انت واهلك وانتو على قيد الحياة ... واذا تقترح اي اقتراح تطفي بي النار او انهم هم سبب هاي النار مكن يتهموك انت اللي شعلتها عادي .. ومطلوب منك تجي تبصق وياهم على النار والا انت جبان
_الفندق مالتكم ابوابه مشرعة واكو هواي ناس عدها سلاح يفوت لاي غرفة تعجبة شوكت ما يعجبة بلا حساب ولا كتاب ومحد يكدر يحجي ويا لان هو جزء من ادارة الفندق او تابع لادارة الفندق
_ادارة الفندق مالتكم واعضاء مجلس الادارة ياكلون ويشربون وعايشين بالاجنحة الرئيسية للفندق وخدمة خمس نجوم براسنا وما يدفعون ولا فلس ومطلوب منك انت تسدد القائمة بمكانهم وممكن يشمرون أي نزيل من سطح الفندق ومحد يحاسبهم وهمة نفسهم عدهم اشتراك وعضوية بفنادق اخرى وعوائلهم مقيمة بذيج الفنادق
_ادارة الفندق مالتكم والناس المسؤولة عن الامن بي ممكن باي لحظة يدفرون عليك باب الغرفة وياخذوك للسرداب ومحد يسمع بيك بعد لمجرد اسمك او لقبك او يجوز شكلك ما عجبهم
_ادارة الفندق مالتكم وعلى مدى اكثر من 10 سنوات ما كدرت توفر كهرباء مستمرة بعز الحر والصيف ..و اكو غرف ما بيها مي صالح للشرب ..
واطفال تموت من الحر لو من البرد حرفيا ..واحنا بالقرن الواحد وعشرين ..
_الطوابق بيناتهم كراهية وحقد وحروب ومطلوب منك اما تنضم أو تأيد احد الطوابق او تتهم بالخيانة والعمالة للفنادق الثانية
_ ممكن تطلع انت أو أحد اطفالك من الغرفة ما ترجعون بعد لإن احد النزلاء من احد الطوابق قرر ينهي حياتك بدون اي ذنب ترتكبة وانما قرر ان قتلك او قتل اطفالك هو نصرة لطابقه على الطوابق الاخرى ومن اجل الحق والحقيقة والاحقية ... حتى وان كنت ما تنتمي للطوابق الثانية
_هذا الفندق عليك واجبات ومالك بي حقوق وماتدخل من طابق للثاني الا كفيل حتى وان كنت تهرب بحياتك وحياة اطفالك ..واذا كنت من طابق معين فأنت متهم بنظر الطوابق الاخرى حتى وان اثبتت براءتك
و قبل كلشي من اول يوم نزلنا بي بهذا الفندق هذه هي حاله من زمن الادارة السابقة لحد اليوم هو هذا حال الخدمة طول عمرها زفت يعني ما كانت زينة وصارت سيئة ما عشنا يوم واحد نظيف بفندقكم حتى نبقى ....من يوم حرب فندقنا ويا الفندق المجاور لمدة 8 سنوات لو لمن طفرت ادارة فندقنا على الفندق الثاني واحتلينا وصولا الى حرب ام الفنادق الى قطع التموين عن الفندق 13 سنة الى سقوط الادارة السابقة واحتلال الفندق والادارة الجديدة بعد الاحتلال اسوء واتعس
وكل هذا وادارة الفندق تطلب منك تكتب تقييم رائع عن الفندق وتبقى بي
السؤال المطروح الثاني هو زين ليش ما تبقى وتصلح الفندق وتغير ادارته ؟؟ ..
عيوني انت ادارة الفندق وصلت عن طريق انتخابات داخل الفندق ومؤيديها النزلاء من كل الطوابق وراضيين بالادارة الحالية شنو فرق نزيل واحد او غرفة او غرفتين يريدون الخير لهذا الفندق ؟
كلشي ما يكدرون يسوون
فخليكم بفندقكم وخلينا نفتر بالشوارع ندور على خرابة ثانية
رد مع اقتباس
المشاركة الأصلية كتبت بواسطة ميشال فوكو
