غاب الشفق
غاب الشفق والليل خيم سكونه
ولون السواد اجتاح كل النحايا ..
اسدل على كل البسيطه ركونه
وارسل ظلامه في جميع الزوايا ..
احدن رقد واحدن سهيره عيونه
في قبضة الهوجاس صارن سبايا ..
احرمهن المرقاد وارسل ظعونه
الهم والحرمان فوق المطايا ..
والحاير الولهان زادت طعونه
يكتم ولايصدح بكثر الشكايا ..
من غير ربه مايريد المعونه
الواحد المعبود جزل العطايا ..
يعلم بحال اللي تهاوت حصونه
بين السراب وبين خبث النوايا ..
يعلم بعبده ويتصرف بشونه
عليم ماتخفى عليه الخفايا ..
فيه الرجا مايوم جفت مزونه
ترسل على قلب المعنى وصايا ..
اخذت منها للمواقف مرونه
لو هي تعل القلب فيها مزايا ..
منها عرفت اللي تبارق سنونه
ومن ضحكته سالت سموم الحيايا ..
ومنها عرفت ان التسرع رعونه
من عقب ماسوى بحالي سوايا ..
ومنها عرفت ان التهاون مهونه
من طاوعه تكثر عليه الزرايا ..
ومنها عرفت اطلق لحرفي سجونه
قبل يتفجر في خفوقي شظايا ..
والكلمه اللي بالضمير مخزونه
اقدم واسمعها جميع البرايا ..
وعهدي مع الاجواد ملزوم اصونه
لو جارت الايام هي والرزايا ..
اصير فوق الظن ماصير دونه
ولاهمني ناسن تحوك الحكايا ..
وكلن اسدد له مقابل ديونه
للطيب طيب وللخزايا خزايا ..
هذي حروف اللي تهيض شجونه
يوم السواد اجتاح كل النحايا ..
اسدل على كل البسيطه ركونه
وارسل ظلامه في جميع الزوايا ..
رد مع اقتباس
المشاركة الأصلية كتبت بواسطة Dari
