قصيده الجديده(عثرت روح)
أضعها بين أيديكم
صالحلي الحبل وي ركبت المعدوم
وأفرض تكدر..وياك أرد ما مجبور
المغيسل كلب سويته للعدلين
الدمع موش اعله مودك عوزت كافور
طاريك وجع بس احجي بيك عناد
يتثلم حجي ومايسكت الطبشور
من يبجي الشمع ما يسكت اله يموت
وأنه بيك وبدونك مكبل أعله كبور
سرح بس جان شعرك من جنت وياي
اطلعت من عشرتك ظلع بظلع مضفور
مشيت ابلا جدم والعشك عثرت روح
تعنيت لخضارك واطلعت مهجور
وصلت لمرحله مابيه حيل ارتاح
وادور عالخلل والكاك مامعذور
عساك بحيرتي خليت روحي بحال!
فصليه وتحب وانزفت لمخمور
النجم والبلسجن هيهات يتلاكون
سكف بين الثنين ولادرب للنور
نوعين البشر لو شوك لو قداح
صح شكلك سمح بس داخلك بي جور
كلبك لو وجه جا ضاع بيه الليل
يل انطيتك شبابي وماكلت مشكور
العشك نجمه وكمر وثنين ملهوفين
واحدهم براحت بالهم مغمور
انه من عين باجر راح اطيح ادموع
لأن مو الأول أنته الكلبي بي مغدور
كبل جيتك حركتي مصاحبتني سنين
ألاجو كبلك جووني ودمي ظل يفور
فبالك لا يظل وتكول خاف يموت
عله حروره وجمر متعلم التنور
ولو أدري بضميرك ناس متعافين
يضحكون أعله حالي وحايطي المفطور
أمن أفصل حزني ساعه يصير عاشورين
العلم عند الله عمري يصير جم عاشور
شعجب ماتدري من العاشكك شيريد
ايترجه العافيه اليتعنه للدكتور
مو واهس جبتلك واهسين وياي
طاحن يم برودت طبعك المغرور
عطر من سولفت عالورد ماشميت
لأن أعرف شغل تفكيرك الشاجور
رد مع اقتباس
