لون عندك كَلب
مقدمة ...
حين رأيت هذه الصورة بكيت .. لا اعلم , تخيلت احدى بناتي مكان هذا الطفل ... وبكيت , ثم اردت ان اتكلم ... اعتب ... أشكو ... احترت لمن اوجه كلامي .. اصبت بحالة من الهيستيريا جعلتني اترك الكل واتوجه الى ملك الموت ... فكانت كلماتي هذه باللهجة الشعبية ... واستغفر الله ان تخطيت فيها حد ما , فهو اعلم بان داخلنا طاقات وبعض الرؤى تستنفدها !!!
أقول ...
لون عندك طفل جا ما خذيته .. يملك الموت بالله منين اجيته ..؟؟
ينشدك كَلب صفّنته علة هاي الحال .. تنشدك عين تعتب ع الجنيته ..
ما عندك كَلب ادري بك ومامور .. وادري البشر كلمن حد منيته ..
وادري الله رحيم وهذا طير وراح .. للجنة , لان ع الفطرة نيته ..
وادري الشايفة اني بهالوكت مرات .. أسوأ من طفل عالشط وليته ..
شفت ببورمة شتتكَطع الاطفال .. ولو هذا الوطن مذبح دريته ..!!
لكن يا ملك ما ادري بيّه شصار .. من هذا الطفل .. ومن الكَضيته ..
شسئلك لو ردت أسئل شلون انطاك .. كَلبك وترست بالماي ريته ..؟؟
كَلي شكَال من شافك عليه مريت..؟؟ .. منك خاف ..؟؟ لو مدلك اديته ..؟؟
يمكن كَال لك ((عمو الحكَـ اللهفان)) .. وضجت من كَال ((عمو)) وغركَيته ..
يمكن كَال لك ((يا عمو انه عطشان)) .. ومن ماي البحر غصباً سكَيته ..
يمكن صاح ((عمو تعب من الروج .. جفي وع السبح ما عوديته ..!!))
وبدل دفعة وتشمره علة الجرف فرحان .. خذت من عنده روحه ... وتيهيته ..!!
يملك الموت ما همك ثياب العيد ؟؟ .. ولا شعره المحدد لا حذيته ..؟؟
ولا همك وحيد واهله موش وياه ؟؟.. واكيد من البرد يرجف لكيته ..؟؟
ولا ممّيته عنده ... وذابل وجوعان .. ولا يكَدر يرد لدافي بيته .. !!
برد , وبحظن موج , وغربة , خايف جان .. طفل ما يعرف اسمه ولا هويته ..!!
عفت هاي الطغاة وذاك الاستهتار .. بارواح الشعوب ..... وهذا اجيته ..؟؟
عفت الدنية كلهة ونازل من سماك .. حتة تبوكَـ عمره ..!! شكَد ؟؟ دريته ..؟؟
سنة ونص لو اقل , لا ما يطخ سنتين .. ما لحكَـ يصح سلوة ....وسليته ..!!
دعوفه .. ورد علة الله .. وكَله ما موجود !!!.. لو مشتبه كَله ... وما خذيته ..
دخذ غيره جلف ... وشكثر عدنه اجلاف!! .. واذا ردك عليه ... كَله نسيته ..!!
دعصي بهاي امره وكثّر استغفار .. ولو ما قبل منك ما هكيته ..!!
لان ربك كريم , ويكرم العافين .. يجوز يرفعك لمنصب هويته ..
يجوز يزوّجك من عنده حور العين .. ويصير ابنك ((رعب)) اسمه وصيته ..!!!!
شوف شكثر بسهامك نودع احباب .. مرتاح انته ..؟؟ كارك مملّيته ..؟؟
أسف كلك قساوة ودم ابد ما بيك .. لان لو بيك قطرة جا عفيته ..!!!
ونعم .. لو اني منك ما انفذ بيه .. وادخل ع الاله بوسط بيته ..!!
واكَلّه ارجاك ... بس هذا الطفل لا يموت .. ويرب زحمة برحمتك ما فديته ..!!
واحلفنّه بخليله وابنه اسماعيل .. وبالمحسن احلفه واهل بيته ..
واحلفه بالرّضيع المات بيد حسين .. وبكل الجرة بحاله واذيته ..!!
واذا ما قبل مني ... ارضة باللي يصير .. واكَلّه ارضه بعقابك لو رضيته ..
اخذ جنحاني مني ... وحبس يم هاروت .. لو جنّي بجَعَب فانوس بيته ..
لو حتة العقوبة جندي عدّ ابليس !!!.. ارضة وابقة اعبدك يم ثنيته ..
لجن يا ملك اعرف ما تعرف شصار .. بكَلب كل والدة الشافت بليته ..
ولا تعرف الرحمة وانته ملك الموت .. ولا هز كَلبك الحجي الحجيته ..
بس استغفر الله الناس كلهة تموت .. وانته بأمر الله وما عصيته ..
كَلادة حسين كَال الموت للناس .. وانته المكَص بيدك ما لغيته .. !!
بدمووو ... عفوا .. بقلمي
الأمير
2/9/2015
رد مع اقتباس
المشاركة الأصلية كتبت بواسطة المرهفة
