معاناة الورد
معاناة الورد
محسود اعله ربعي وربعي عدوان
ويادنيه اعله ناسي اهواي محسود
زرعتلهم محبه وصرت فلاح
وخيرهم اجاني بزود حاصود
صرتلهم حديقه ومن ردت ماي
اجوني بسيل كطع هرش الورود
وحطوا فوك رمشي اعيوني ناعور
يآخذ ماي عيني ويسكي الخدود
سبحه اتعلكت بجفوف الايام
مل جف اليفرني وحيلي موجود
وكل هذا وكلت ميخالف اتهون
اخوتي اصحاب نخوه وبيهم الزود
امس ببيوتهم من شبت النار
ركضت ابلا وعي اعلة النار هادود
صرتلهم حمامة وصاروا اصكور
وصرتلهم غزال وهمه صايود
كبل لمت شملهم جنت مرتاح
وصاحوا من اجوا بسنيني فرهود
بيام الفرح محد اجة وياي
جاشترجة منهم لو صفن سود
بطل ياكلب من طيبتك هاي
وكطع كل حبل بالخوة مشدود
ورتب زرع طيبك خاف ينداس
ورسم خارطه وحط حد للحدود
اخاف اتصير محتل من الوياك
وتتحول قدس وكبالك ايهود
زرعنه وماحضينه بتعب فلاح
من كل العنب حصلنه عنكود
بالك ياكلب لاتفتح الباب
اجتك ريح لازم تبقى مسدود
واذا جان انه طبعي الورد والياس
واعرف تنطع عالطيبه الورود
ارجع ونكلب عالينكر الطيب
واصيرن مو ورد بعيونه بارود
رد مع اقتباس
