قصيدة بحق الامام علي عليه السلام للشاعر المبدع عبـــاس العبـــــــــادي/ سوق الشيوخ
علي بطبكات جفنك للمدامع باب
يشبه كلبك المايوم سديته.....
على ساحل جفوفك لليتامى بيوت
وجفنك حارس بكل باب خليته.....
لأن ماضل يتيم بعصرك بلا ثوب
جبت بيدك يتيم لثوبك انطيته.....
على روحك نمت...وأيتامك على فراش
وعلي يمك غفه...وبالسهر غطيته...
وبدموع الارامل شفت موجة جوع...
جبت مركب خبز بالدمع رسيته....
صنت ماي الكرامه بكصة المحتاج
خفته يجدي رحت لجفه جديته....
وزفيت الخبز ...لشفاف كل جوعان....
ولحلك المنيه الجوع زفيته....
بيتك بيت فقرة وجان كلبك باب...
لكن باب اكبر من حجم بيته...
شافك منقطع....محبسك عنده عيون...
غمز للسائل وشاورك...وانطيته
ونمت بفراش اخوك....وفز خيالك بيك...
سلحته....وحرس وي طه مشيته...
وسيفك بالحرب....أذن اذان الموت
وضيته جثث...وارواح قريته...
أجه خيبر لجفك دك عليها الباب...
خافك توجعه لو رحت دكيته....
وسويت ببدر بالروس شحة روس...
وثوب ارواحهم عالسيف شريته...
معاضد روسهم....بزنود ذو الفقار...
وجفك دمهم بكل حرب حنيته...
رماد ارواحهم...وشفاف سيفك ريح
طشرته...وعلى كبر الكاع ذريته
ذو الفقار رحه وروسهم محصول....
عبيت الزلم والسيف بريته....
علي....ويوم ابن ود هل من منازل صاح
هبت جفك السيف وكوه كضيته....
لكمة العامري....والسيف ميت جوع
كضيته لحم....وعظام ذبيته
نسه سيفك كرابه بكثر خطف الروس....
مدري انته بكثر ماشلته نسيته....
مدري انته بكثر ماشلته نسيته....
رد مع اقتباس
