الجنطة !
من جنت بالابتدائية جنت احط كتبي بعلاكه نايلون لان ابوية ماجان يتمكن يشتري الجنطه وابد ماجنت افكر بيوم ما اشيل جنطه لانه كان المهم عندي هو التفوق و النجاح بالدراسة وجنت احرمص لابوي يشتريلي باسكل أسوة بأقراني حتى يوصلني للمدرسه واشد كتبي بالسله لكن كل مره كان يواجهني بالرفض القاطع بحجة الخوف عليه من الشارع الملئ بالسيارات واذا شافني ضجت واعتكفت وظهرت عليه علامات اليأس يبادر بقلبه الحنون ولحيته البيضاء كانها كوكب دري انه اني اذا نجحت يجيبلي الباسكل ورفقا به كنت اوافق على شرطه . جنت استلم يوميتي واروح للمدرسة بكل نشاط وحيوية اقل من يومية اخوتي باعتباري ازغر واحد بيهم وتكون مصاريفي اقل منهم وقبل دخولي باب المدرسة اوكف وسط الحديقه بالجزرة الوسطيه ارمي كتبي جانبا وابدي اعدل ملابسي واشد السيم اللي جنت مسويه حزام بالبنطرون بدل الحزام الجلد واغطيه بالقميص حتى احجب الرؤيا عنه من قبل زملائي في الصف او المدرسه وارتب قيافتي كاملة حتى قيطان حذائي الجوبلس واركض بسرعة للصف اخفي علاكة كتبي في جوف الرحلة المدرسيه لئلا يراها احدهم اعمل كل هذه الحركات لاكون بالنهايه تلميذ نموذجيا لاتبدو عليه علامات التقشف والعوز . هواي جنت اكابر كدام زملائي التلاميذ خصوصا من ابناء الدكاتره والمهندسين والميسوره امورهم وغيرهم من شرائح المجتمع اضع امامي عقال ابي وشيلة امي وانا .بل كنت عونا للمحتاج الى مشوره او معلومه .ومن يدك الجرس للفرصه تبدأ العصابات من شعبة أ وشعبة ب بالنزول للساحة المدرسيه وتبدأ فيما بينهم الصراعات وكأنهم في حلبه . احمد مكراضه وجماعته وسمي بهذا الاسم لانه دائما يتعارك بسجينة المكراضه وكذلك جاسم ابو الياي لانه كان يحمل سجينه ام الياي وفصل الاخير من المدرسه عدة مرات ورجع بسبب اقربائه الذي كان مسؤولا مقربا لدى السلطات . جنت اباوع عل الساحه من الطابق الثاني وهواي افكر اكول ماذا سيكون نتاج جيل هذه الحلبة المدرسية وقد نشأ وترعرع العنف بادمغتهم ؟ شلون راح يتعاملون وي المجتمع وفق اي أسس وأي معايير ؟ ماذا سينتجون من اطروحات تغذي المجتمع ؟اثناء هذا التفكير يضرب طالب ابن الحداد على جتفي ! ها طالب ؟ يلله خل نطلع لفاتنه ناكلهن ترا مصاريني جاي تتكطع ! ارميه بابتسامه عفويه بوجهه الجنوبي الكالح واكله اي والله اني همات جعت نفرش العلاكه عل الصبه المطله عل الساحه ونبدي نكرط خيار كبل لانبلش بالكباب العروك لان ميزانية اهلنا كانت لاتسمح حتى بمرورنا امام الحانوت المدرسي المطعم بالمشروبات الغازيه وشربت الصناعي المعمول في البيوت ولفات الفلافل والعمبه .ناكل ونباوع عل الصراعات الدائره في الساحه المدرسيه بضحكات متبادله بيني وبين طالب وشلون البوكسات صايره بفلس بين التلاميذ ومن نخلص ننزل نرجع للصف قبل مايدك الجرس ومن ندخل للصف نشم ريحة التفاح والبرتقال وقد ملئت اجواء المكان من قبل التلاميذ ذوي الدخل الجيد اللي بقوا بالصف حيث موائدهم تنشرح وتطيب لها النفوس بالعافيه عليهم ولفاتهم الملفوفه بالكلنس امشي مثل الطاووس امامهم واكابر وابحش بسنوني دلاله على اني ماكل اكله دسمه واني الله وكيلكم غير الخبزه والخياره ماكو بلفتي .
عودة الكعبي
رد مع اقتباس
