هنا

[أنثى حائرة]

مساء الخير
صديقتي كانت ع علاقة مع شاب استمرت 5 سنوات وكانت تحبة كولش وهوة هم يحبهة بس اهلهة هسة دروا بيهة وكالولهة تعوفي ..فهية ماعندهة خيار ثاني غير انو تعوفة ..وفعلا خابرتة وكالتلة كولشي بينه انتهى ..بس هوة مصر ميقبل يكولهة مو بكيفج بكيفي ..المهم ..قبل شوي اتصل بيه وسألني اسئلة هواي شكيت بيهة ..مع العلم أحنة طالبات سادس ودناخذ محاضرات ودورات فهو سألني ع مكان الدورة وبأي ساعة فآني كتلة ليش تريد تعرف كال لا بس بنت كرايبنة البارحة شفتهة وانطيته امانة وكتلهة وصليهة ل..(صديقتي) ..وهي البنت متندل ..المهم لح علية ودليتة عالمكان ..وكتلة "توعدني بأنك ماراح تسوي شي ولا تجي" فهوة حلف بغلاوة امة ووعدني انو ما حيسوي اي شي ..كالي لاشي يلوحج ولا راح ااذيج ولا ااذي صديقتج وعد ..بس كالي اريدج توعديني انو ماتكولين لصديقتج انو خابرتج وسألتج ووو..المهم اني اخذت منة وعد ..وايضا وعدتة اني مااكللهة
هسة ظميري ديأنبني مابين اني التزم بوعدي ..واني خايفة اذا يصير شي ع صديقتي ..بس هوة حلف ووعدني انو ميسوي شي
ومابين اني انقض بوعدي واكول لصديقتي
هسة محتاجتكم اصدقائي كلش ..كلش..ارجوكم بسرعة جاوبوا ونصحوني شأسوي ارجوكم

[مورگن°•]

حذري صديقتج أحسن
أبناء الحرام هواي ^_^

[حـــلاة الـــروح]

انطي خبر لصديقتج والمفروض متنطي اي معلومة لهذا الشاب واذا حب خمس سنين ليش ماخطبها الحد هسة
حبيبتي خابريها انطيها خبر افضل

[وآنا]

ميصير تنطي معلومات عنهة حتى اذا لح هواية
وهو اذا بحبهة اكو باب ويدكة ويتقدملهة
المهم هسة انطي خبر لصديقتج هواي احسن
لان خاف تسمع منة انه انتي منطيتة معلومات
وبعدين حتصير مشاكل

[تشيللو]

خطأ من عندج..وافضل شي تخبرين صديقتج لانه وكتنا تعبان ..

[*Rafa*]

يا بنات ماكو حب حقيقي اني مااؤمن بالحب كله كذب والاحسن اتخبري صديقتج والا تصير مشاكل بينجن .............
الحب كذب واجمل مافي الحياة انو ايكون الحب الاول والاخير للزوج وهيج اتكون الحياة سعادة وثقه واخلاص لان حته لو اخذتي التحبي راح تبقه الشكوك لان راح يغكر الزوج مثل مامشت ويا تمشي وي غيرة واليحب صدك يخطب ما يظل يتونس طلعات وطبات
وشكرا اسفه عالاطاله

[اساور ورد]

عزيزتي خمس سنوات مدة جدا كبيرة وهذة العلاقة من الاساس خطأ فياعزيزتي صار صار وانتي طيتي معلومات والوقت الي بي احنة هسه صعب جدا وخطير انتي لازم العمل الي تقومين بة الان تخبرين
صديقتك عن هذا الاتصال بينكم انتي والشاب. حتى تاخذ حذر منه .انتي لازم تخبرية لان بعدين تندمين اقلها احترمي علاقت صداقتك والعشره البينك وبين صديقتج .وخبريه. والله ان شاء الله معكم.

[Echo]

ما تحتاج روحي للقاضي خليج واثقة انه افضل شي تسوينه تكولين لصديقتج

[Ćat]

حذري صديقتك
ولا تعطين معلومات مره ثانيه لغريب

[fairy touch]

طالبة سادس و تحب صارلها 5 سنوات ؟ من ياصف تحب ؟ من الاول متوسط .....
بعدين من اسلوبه وياها ..على مو بكيفج تقطعين علاقة و كله بكيفي ..بدل ما يكوللها اجي ابيض وجهي و وجهج كدام اهلج و اتقدم ! هذا شنو من نمونة لعد ...
وانت فوكاها تنطي خريطة تحرك البنية ..منو يضمن ما يخطفها ؟ ماكو مخابيل هواية بهالوكت مراهقين يسوون اشكال الوان .
اتمنى تكونين فعلا انطيتيها خبر و حذرتيها ..لأن سالفة امانة و كرايبه و هالسوالف مبينة كذب ..الله يحفظ بناتنا ..و يستر عليهم ..
و انت هم بعد ليش عنده رقمج ..اقطعي اتصالج بيه ..انت شدخلج اصلا بينهم ..هي ام الآنة قطعت العلاقة ...اوووف شلون تدخلون نفسكم ابلاوي بس الله يعرف تاليها ...اني هسة صدك ضجت ..
الله يهديكم و يحفظكم .