درر العراق

احمد العثمانيے · 16/July/2015

وضيني حلال ونوم
العطش متيمم بروحي والك صلى
بلاش الريش يم راسي ولا مديتله جناحي
احب ريش الحلال اغلى
تعال الحك گبل ماتنمد جفوفي اعله ماي المايعرفوني
ترى ذنوبي اعله گد جفاك
سبحني اعله ماي الله
ولامردي عرف يندل بعد ماي العروس بروحي مامجيوس
شوكت تضحك روازينك ضوة ويبجيلك المحبوس
روحي وياك كاغد شوك ضم روحة بكَلب فانوس
رطب درب الفخاتي البيك وانا جفي شكثر مشموس
بيا شاطي الكة قلبي يفوح قداحة
وبيا ليله اسير للزلف راحه
وامدد بين طين وماي والعب بالتمر شفه
وامرجح كل شمس بكَلادتك لهفه
غير الكَه ,,,
غير الكَه ,,,
وادك خزامتك بالروح واصبغ كل نثايا الراس من لونك
وافصل من حزن روحي عبايه وليل واشمرهن على امتونك
وافرعك واشتهيك اردود
واطش الحنطه واتنطر كًطه عيونك
يتفاح السما .. شلونك
يبرحي شرطبك والشمس من سنين ابد ماجاست خيالك
ياعثك الضفاير يامتن شالك
بعد جم طيف والتم واوكَف بحيلي
وبعد جم ليل وازرع بيك نجمة تكابل هلالك
واطفي المستحه واعلك عطش روحي وجه ثاني
واذب ستر الليالي بحضن حرماني
واكلك يالخذاك المستحى شمالك
فاض الماي بيك وبيه فاض الماي ..
يامرغوب شمتاني؟
يامرغوب شمتاني؟