بالبرمجة عادة .. اني كلش دقيق
و ما اعوف وراية (متغير) ما اسويله حذف من الذاكرة ورة ما اخلص منه .. لو اخللي خطأ يصير بدون عرض رسالة خطأ للمستخدم (يعني مو صم بكم .. طب البرنامج ساكت .. عكس هواي مبرمجين هواة)
بس .. للاسف الحال مو هيج بالنسبة لـ مازدتي (يعني المازدة مالتي للي يعانون صعوبة بنطق العبارة) .. و دائما اعاملها بقسوة و على كولة واحد .. لو عدها لسان جان ولولت
هي طبعا .. اشتراها والدي بـ (18) ورقة كما يعبرون .. يعني تطلع حوالي 18 الف دولار (بلكي تعبر عل غشمة خخخ) بالضبط بعد السقوط .. و ظلت عد ابوي بعد اني بديت اسوق بيها .. لحد ما دبرت جم فلس و اشتريتها منه .. علمود اخلص من الملاحظات و التعليقات .. لأن ابوي سايق قديم .. يعني على كولته 35 سنة هو يسوق !! يعني يجوز فر الكرة الارضية فد عشر مرات يمشي سلولي..
اني طبعا .. اول ما استلمتها .. اعتني بيها .. و ابدل الدهن مالتها كل مدري شكد .. و أركض على عطلاتها اصلحهن .. و شلع كلبي الـ (كلج) كل مرة ابدل الـ (عنبار) مالته بواحد جديد اصلي ياباني أخو الكوري تقليد الصيني ليغاد من الروسي . و يخرب .. لحد ما اشتريت (عنبار) من الـ (تفصيخ) مزنجر يلعب النفس نكعه الفيتر بالدهن يومين يالة (فل) .. بس شو اني شديته و بعد نسيت الكلج و (فكسان) الكلج .. المهم
بس اني بديت شوية شوية اهملها لحد ما وصلت حاليا أعلى حد من الإهمال .. و احس طبعا بالذنب و تأنيب الضمير اللي يؤرقني و ما يخلليني انام ..و هذا الشي خلاني اروح يومية يم جاسم (اتعلل) للـ 2 الفجر وية الحبربش و ضحك و سوالف و جايات و كرزات و جكاير
السيارة .. هي خوش سيارة .. و اني احبها .. و اني متأكد تحبني و تموت علي .. و ما فد يوم (سلهمت) بطريق .. هي مجرد مرات تشتكي تشتكي .. و تطلع اشكال الاصوات و الطكاطيك .. و اني اغلس ..من منطلق الحاجة اللي تداريها تخرب .... و العجيب بالامر .. انه الصوت وحدة يختفي بعد فترة .. و سألت أحد الاصدقاء عن المسألة .. كال (هو المريض يون يون ..و بعدين يموت) كتله (و يجوز شاف ماكو فايدة من الونة و كلك عليمن باح صوتي)
بس من جهة أخرى .. اني خوش سايق يعني تعلمت بفترة قياسية و حفظت كل العلامات المرورية ..مثلا من اشوف قطيع (صخول) بالشارع .. يعني أكو ليغاد خوش مزبلة . و من اشوف (جيحة) .. يعني اكو بوري مي مكسور لو منهول مسدود (تميز من العطر) .. و كذلك اني احب السرعة .. و اسوق بذكاء و ذوق و اخلاق ب ... عدا بعض الصدمات البسيطة جدا اللي في الغالب . اللي تكون (صوج) الطرف الاخر.. ..لأن اني سياقتي نظيفة رغم سرعتها
من هذه الصدمات البسيطة .. مرة ضربت (لوري) .. بس مو صوجي .. هو جان واكف .. و اني دا ارجع لي ورة و ضربته و هذا إدى إلى (كدمة) في الجنطة .. و تفطر (البك لايت) و لحد الان يسمع حسكم
ايضا حالة أخرى .. جنت دا اعبر تقاطع بالعرض ..و ما انتظرت دوري بالمرور .. و النتيجة انه اجتي سيارة نسيت شني هي (طنبت) بصفحة المازدا اليسرى .. المازدا ما صار بيها شي بس الدعامية مال هذيج السيارة وكعت بالكاع .. و خسرني 75 الف دينار عدا و نقدا ..دفعتها إلها عل راتب .. بعد ما اخذ مني الجنسية و السنوية
حالة اخرى بسيطة ....بس هاي ابد مو صوجي .. دا اطلع من الدائرة و رجعت لي ورة و بنفس الوكت استدير بسرعة.. و ضربت (الصبة) الثولة .. و ادى هذا إلى تفليش الصبة . و الباب مال السايق طب بصفحتي .. و خسرت كذلك 20 الف على (دكدكة الباب) ..(هم رادوا 75 الف .. بس كتلهم بوية شني كامري .. طكطكوها شلون ما جان بس كون تنسد الباب .. و لحد الان اثار الصبة موجودة على شكل تموجات بالباب اضافة رونقا و جمالا للسيارة
مرة ضربت كابرس ..جان ديطلع من بيتهم بمنطقة سكنية .. و اني ضربت بريك مو ما ضربت .. بس بسبب السرعة الهائلة لطمت الكابرس لطمة معدلة .. طبعا الكابرس عبالك همر ما صار بيها شي .. بس النتيجة اللايت الامامي و السكن مال المازدا صارن ثريد
مرة ضربت سيارة حديثة .. و كلششششششش حديثة ..جانت واكفة و السايق ما موجود .. لذلك استغليت الفرصة و فلتت بعد ما تأكدت من عدم وجود السائق ... بيب بيب .. يوووووووو
يعني .. صارت عدة حالات من هل نوع ..اخرها اليوم .. جنت اريد اشتري ركية .. و صعدت واحد وياي داكتة الشمس متسوك و يريد يرجع للبيت كلت ثواب و الله يوفقنا .. كتله اخوي بس اشتري ركية منا و نروح .. دا اسولف وياه و الوف اريد اطبك ..تفاجأت أنه اكو (سيارة) ما شفتها طابكة بهذا المكان .. و بس سمعت الصدمة .. و تالي نزل السايق يكول عمي هسة لو بشر هم جان ضربته .. كتله عمي عوف هاي السالفة ..كللي شكد يكفيك تصلحها كال عمي روح الله وياك بس دير بالك مرة اللاخ .. كتله بكلبي اصلا بالي تووب خخخخخخخخخخ
هسة هي .. مخلصة دسكاتها (يعني بريكاتها) .. الصالنصة صايرة طابوك جمهوري .. دبلات (تشكم) . صدر يخرخش جنه صدر شايب كاضي عمره يدخن سومر (سن طويل) .. بالاضافة إلى بعض الكماليات البسيطة مثل الضوء الداخلي ، التنتة تخر .. التكمة مملوخة .الراديو سلمها .. و اخيرا الإشارة على جهة اليسار ما تشتغل .. و هذا الشي اللي يخلليني قدر الإمكان الوف عل يمنة
هسة . اللي انعجب بيها و يريد يشتري ..خللي يتفق وية جاسم الزركاني صاحب منظومة بسام (شلون رهمت ما ادري لأن ماكو واحد عدهم بالعائلة اسمه بسام) .. و ما يكون خاطره إلا طيب
رد مع اقتباس
المشاركة الأصلية كتبت بواسطة firefox
