هنا

[¥محبوب$القلوب¥]

عـن هالسـياسـييـن .. وينك يبو حسين
اليحچون بسم الدين .. وينك يبو حسين
يـاعلـي هـالايـام
عدنه اشكثر ايتام
ويــنك يـبـو حسـين
------------------------------
ياعـلـي وينـك يحـيدر هـالزمــن خـَلـف مــآسي
نشـتكيلك احنه جـينه سيـدي امن اهـل الـكراسي
بسـمك ايحكمـون همـه ودورهـم چــان الاساسي
ماخافو الله بالشعب ....... ماشفنه منهم بس تعب
ايسلبنه من هَبه ودب ....... ويعتبر نفسه سياسي

ردناك انته اتقيس .. وينك يبو حسين
ابنص لندن وباريس .. وينك يبو حسين
ابيوت الهم الظلام
وعدنه اشكثر ايتام
ويـنــك يـبو حــســين
------------------------------
احــنه مـن نـنقد ربعـنـه غــيرهــم لا مــانـجامل
مــثل مـا (فـُساد) عــدنه هـمه عـدهـم بالـمقابل
مـانخــاف اولانهــاب الباطـل انـگله انـته بـاطــل
ولو چان شيعي مذهبه ..... من حقنه احنه انحاسبه
ابدرس الحساب انتعـبه ..... والله ماعـدنه تـساهل

خـل يسمع المسـؤل .. وينك يبو حسين
كل عـذر ما مـقبول .. وينك يبو حسين
نــادينه بالاعـلام
عدنه اشكثر ايتام
ويـنــك يـبو حــســين
------------------------------
هالـتقـشف النـعيشه امــن الـسياسيين اســاسه
مــن رواتبـهم الضـخمه هــالـبلد اعـلـن افــلاسه
شـوكت يلتـفتون الـنـه وبـيدهـم هـسه الــرئاسه
اشگد واعدونه وما وفو ..... اولا مره وحده اتأسفو
ياوسفه بالخضراء غفو ..... وكلمن ايسوي البراسه

بالدنـيه مايــدرون .. وينك يبو حسين
وبالفقره ميفكرون .. وينك يبو حسين
ردو زمـن هـدام
عدنه اشكثر ايتام
ويـنــك يـبو حــســين
------------------------------
ياعـلي انـته الخـليفه اشــگد چنـثت تســتلم راتب
الحـزبك اشـسويت بالله اشحـصلو مــنك مــكاسب
اشـكم وزاره اشـكم سفاره اشـگد اخذتلهم مناصب
عيَـنت ولــدك بالقـصر ..... راتـبهم الاسمي اشكثر
اشتنطي الحمايتهم آجر ..... وهم فتحت الهم مكاتب

إلبسمك اليحكمون .. وينك يبو حسين
بموالنــه ايلعـبون .. وينك يبو حسين
شفطو نفطنه الخام
وعدنه اشكثر ايتام
ويـنــك يـبو حــســين
------------------------------
انـريد مـثلك شـخص يحـكم يمتلـك حكـمه ودرايه
كـون بــابـه مايـسده للــيجـي وعــنده شــكايه
ولـو گـصد مسـكـين يمـه مايـدفعـونه الـحمايه
الچوَو گصَصهم بالترب ..... الدين بسياستهم خرب
واحدهم آيـه لو خطب ..... وبرگبته اشگد ضحايه

إلعـدل مـامـوجــود .. وينك يبو حسين
والمهدي يمته ايعود .. وينك يبو حسين
بيا شهر وبيا عام
عدنه اشكثر ايتام
ويـنــك يـبو حــســين
------------------------------
تمت والحمد لله
------------------------------
خادم اهل البيت حيدر تركي الكربلائي

[حيدر الطائي]

قصيدة جميلة جدا
شكرا لك عزيزي

[¥محبوب$القلوب¥]

قصيدة جميلة جدا
شكرا لك عزيزي

عفواً أخي و صديقي حيدر أنرت الموضوع

و شكراً لك على التقييم