حسبالي كبرت ... !!!! بقلمي ..... مهداة
اقول بلسان حال هذا البطل واسئله ان يتقبلها مني كاقل هدية لشيبته المقدسة ...
...
...
...
حسبالي كبرت .. كلت استقر وارتاح
وامشط شيبتي واكصد للزيارة
واتلاكة وية ربعي ونذكر اللي فات
وايام الحرب بالبصرة وعمارة
ونتذكر الماتوا بالحرب شبان
ونقرة الفاتحة ونهديهم بشارة
شو من كبرت ما فارك البسطال
رجلي البيهة لسة اثر بسماره
وبعده الخاكي لبسي وهم مرقط صار
ومكان السبحة بيدي لهسة غدارة
فرق بس العصابة البيهة اشد الراس
تكلي انته مكلف ... لكن بغارة
وامر مو من عقيد اهجم علة العدوان
غدت فتوة المرجع هية أمّارة
ولا .. ما ودّي افر وامشي بأمر تزوير
فرق هسة المكاون اني مختاره
اصول علة الكفر والذبح والتهجير
واحمي تراب اهلنه وذاك اطم عاره
الفزت مو صعبة عندي الفوز للشجعان
وانه ابن الفزع للحرة مكواره
واذا اني متت يا محلة طلقة موت
من جف ناصبي يدور لبدر ثاره
أظنهة اروحلي من جلطة وكشف دكتور
ورد جيب الدوة وهم غالية اسعاره
كافي من العمر من قبط السبعين
دخل يروح فدوة لعلي وزواره
واوصيكم شباب ان جان اخذني الموت
لا تنسون جدكم واخذوا بثاره ....
لا تنسون جدكم واخذوا بثاره ... !!!
بقلمي القاصر
15/6/2015
رد مع اقتباس
