اليرسم ع الرمل
اقشمر بالوجوه البيهه ضحكت غيض
واذم يم الشماته وكلت ماكو احساس
وانه مراهن كحيله انكسرت بمركاض
واهي عميه وعليله اتريد تربح داس
وجاملتك عمر بس مو عمر مليت
وبديتك صبر يالما ترست الكاس
ما قستك ضعف بالكوه اقيسن بيك
بس وكت الصدك ..تحت الصفر تنقاس
زارعلك فرح جوه الجوادر نار
واضحك بالوجه واطرب طرب اعراس
جنت فوهة محبه ومادرت للغيض
درت ظهري اطعنتني وركبت ترباس
نبرت صوت حقدك شاهد اعله الصار
ولسانك تعثر عاش بيه وسواس
ياشلهه وثمر طشرهه جم شيطان
شبعت ناس كبلي شكد كلتك ناس
ياشجره اعكرت وتذري بس اتراب
ما احتاج ظلج وجب حد الفاس
لم روحك تجمع شد نطاق الخوف
واضحك ضحك شامت عالحلك تنباس
واقسملك يمين ويا يمين اتريد
ماينبض كلب لامايدنك راس
بس كلي شتريد تروح ..الله وياك
دست فوكي جسر تاليك هم تنداس
اليرسم عالرمل لازم يصاحب ريح
لاتشتد تهب واتطير الاحساس
واليبني المحبه وينتجي اعله الشوك
كبل كل البناه لزوم يبني الساس
ياصورة غدر يالبيك لثكة عيب
ماتنشف ابد وثلوث الينجاس
يادير وكنيسه ويلصليبك خاف
تتكسر وصل كلما تدكهه اجراس
روح وداعت الله وخلصت مليت
واغم ذيج السنين البيهه كطع انفاس
رد مع اقتباس
المشاركة الأصلية كتبت بواسطة المُتعطّش
