ما خايف عليك آني من العيون .. أنا خايف على اعيون اليحسدون
لأن وجهك شمس بعدال شمسين .. عمه اعيون الشمس نورك يمزيون !!
سيفين الحواجب تسلب ارواح .. ذباح الرمش ... كتاله العيون
يل رمشك خناجر حاده اهواي .. باحساس اليشوفونك يجرحون
شعرك جيش كافر أسود الروح .. وگذلتك قاتلة تسل اليلمسون
رصعات الخدود اگلوب تغتال .. دكتاتور خدك طاغي عالكون !!
لون الشفة بين الثلج والنــار .. بس لهسه ابد ما ندري يا لون
شفايفك مو شفايف خمرة واعناب .. اذا بيهن حچينه الكل يسكرون
سنونك بيض حدهن يشبه السيف .. شاماتك گلبهن اسود اللون
صوتك بي سحر مستعبد الناس .. بس يأمر وإله العالم يطيعون
أخاف امنين ؟؟ منك انته ينخاف .. عيونك باليغازلهن يجرمون !!
ورغم كل هذا طبعك طبع فرّاش .. وعلى اچفوفك ينام الورد مامون
وأرق من الورد وهواي شفاف .. وأنعم من حرير الكل يشهدون
للتأنيث أصبح همسك التاء .. وإنوثة البيك أصل النسوة والنون
خصرك مو طبيعي وفارع الطول .. ومشيتك وگفت دنيانه والكون
تشكيلة مفاتن جسمك انصاغ .. بورود وهيل ويه العسل معجون
وره ثيابك جبل جوهر وياقوت .. وبانواع الكنوز الصدر مكنون
من عطرك يغار الجوري والياس .. وحور العين من حسنك يغارون
مثلك بالحسن ما شافت الناس .. ومنك لا أبد ما جابت ابطون
يا يوسف ؟؟ جمالك لو يشوفوه .. رگبهم مو أصابعهم يگصون
رگبهم مو أصابعهم يگصون
رد مع اقتباس
