گوة على گلبي دست وگوة على روحي قسيت
مو هينة أجي بذلتي واوگف بباب البيت
دگيت بابك خجل وبلا خجل دگيت
وإرتجف بية الجدم وعلى الهوه توچيت
وفتحت بابك إلي سلمت ما رديت
وسمعتك تگول بهمس : ياريت لو ما جيت
لا ترتجف يا حلو شامخ جبل خليك
ولا تهم باللي مضحكك اهتم باللي مبچيك
تدريني هسه ش شفت وش عشت وش عانيت
أدركني وكت العشه وبعبرتي تعشيت
وبترابك تيممت وبدمعتي توضيت
ومن صار آذان العشا يم بابكم صليت
ومعذور كون قلقت هذا القلق مشروع
آني ادري جيتي الك تخلق الف موضوع
آني إعتباطآ الك ما جيت يالمحبوب
مرتني لحظة ضعف وحسيت كلي ذنوب
ردت الله يغفر إلي بس بيمن اتبارك
شديت عيني بحبل جابتني يم دارك
ولا يا حبيب الأمس اسمعني أترجاك
لو تدري ليش أعتني ولو تدري ليش أهواك
لولاك ما تيهت وأمشي ورة اليمشون
ولولاك ما طفحت وأحچي ورة اليحچون
ولولاك آني صلب ما تمرني اللوعة
وعيوني مثل الحجر ما تعرف الدمعة
وتگوللي شنو هالوزة وشجابني بهالليل
رغم الجرح بيه جرح والحيل ما بيه حيل
ورغم النهار انگضى والدنيا صارت ليل
صح جيتي محرجة وصح جيتي تخجل
بس مغصوب أجي بهالدرب بالشامت أتوسل
چي عيني لمن بچت محد ينشف جاي
والروح طيرة عطشت وتريد قطرة ماي
دمعاتي صبن بيدي عود احنه متراضين
وشلون حال الدمع من نرد زعلانين
وية الغريب اليمر يا وسفتي تساويت
وزيدت حزني حزن لو ادري ابد ما جيت
ظل هيچ لا تعتذر أدريك ما صديت
صح بالگلب رحبت بس بالوجه صديت
وتريد اذكرك انه شيهمني هذا البيت
هنا طفولة دفنت بيها اندفن حلمي
وهنا بقى دفتري وأوراقي وقلمي
وهناك مميتي وهناك صدر أمي
وهناك باقة ورد مكتوب بيهه اسمي
وهناك كومة حجر سويت بيت بيوت
وهناك گلبي انولد وهناك شفت الموت
ظل هيج لا تعتذر أدريك ما صديت
صح بالگلب رحبت بس بالوجه صديت
والتوبة أمرلك بعد چي بالوجه صديت
رد مع اقتباس
المشاركة الأصلية كتبت بواسطة جوهرة واسط
