( العب )
ابچي من زودة حلاتك
وابچي من واهس الساني
بطاري ذچرك
موبديه ...
ماذكرتك الا من كل ضيجه
من ضيجات خلگي ...
وزينه من زينات ذاتك
ليش گلي استعجلت ؟
والروح مرهونه كلبدون ابعباتك
انه بيه امن الدعه ...
لطولك الف ورگة عنب
وارجه گربك بالتهجي
وروحي تباعة ذهب
بالحلم ختيله نلعب
بالحلم وياي چنك
وانته بحساب الورد ...
لنك ورد من لزمه تتعب
يلي نايم على طولك
تشتعل مثل الگلاده تشتعل چن
خرزه ليلو او خرزه كهرب
او خرزه ماتنحچي اوتلعب
گدرت طولي اعله طولك...
وانته كلما اتساهلت وياي تصعب
يلي حسنك فوگ حسن الناس
كل الناس ...
شمرة عصى وبيك شويه ملعب
العب العب ...
بويه العب
يا بعد خالي ...
عليك الحمزه ابو حزامين تلعب
آنه تندگ روحي هلهوله ابسامير
امنشوفك ويه كل الناس تلعب
وانته گلبك ينكسر مسقوله واطيب
مظفر النواب
رد مع اقتباس
