( إشگد عسل وآشگد فشل )
أشگد عسل
من تمطر شْفاف المحب
وتبلّل. بريجك. قُبل
وعثوگ برحي
تْنگّط بحلگك نده
بطعم العسل
إشكد عسل
لمّن عليك البرحي
بعثوگه نزل
يتدلّى ويغيظ النخل
وشگد عسل
من تسمع
حْچاية غزل
تتشلبه للمريخ
وتعانق زُحل
ويزوروك بشوگه الگمر
وتمدّه گلبك
موش چفك عالكمر
أو ها وصل ها ماوصل
وْلنّه الگمر منك جفل
لملم خيوطه السارحه
وعنك ٠٠٠ إفل
وشْگد فشل
لمّن تِفِز من نومتك
وتشوف روحك
لا حبيب وْ لا عسل
ياخيبة الخيبه
دشوف شْگد فشل
حتى الوساده
عْليك كاتلهه الخجل
بس وكتك البد ذات
منّك ما خجل
الشاعر شاكر حنون
رد مع اقتباس
