قصيده مكتوبه في ذكرى استشهاد الامام الكاظم عليه السلام
بينه اجروح -- ونه ونوح -- عالكاظم بواچينه
------
يادمع النواظر سيل -- لاتبخل على الكاظم
وياجرح الگلب انزف -- واترك لومة اللا يم
هذا ابن النبي المختار -- طاح ابولية الظالم
من سجن السجن بالقيد -- بتراب السجن نايم
ابسجن هارون -- بيه يقسون -- محرومه الوسن عينه
--------
نبچي اعله الگضه مسموم -- ابطاموره وسجن مظلم
ماغير الهوه ايمر بيه -- ولاينشد عليه مسلم
ابمحراب السجن خاشع -- ساجد راكع او مكظم
غيضه كاظمه وصابر -- وصبره يرهب المجرم
غاب اسنين -- عن العين -- ابطاموره گضه اسنينه
---------
گضه اسنينه ابسجن وقيود -- تحت الارض طاموره
وهارون بطرب وبكيف -- جواري وخمره بقصوره
منه خاف عالسلطان -- وعالكاظم يصب جوره
راد ايحجبه عن الناس -- راد ايغيبه النوره
اشكبره الهم -- ابسجن مظلم -- ابصبره ايجاهد الدينه
---------
ابصبره ايجاهد وصابر -- وقيده ابساگه شيفصمه
محد واجهه محد -- ابسجنه ولا اهل يمه
ماحضروا واجوا شافوه -- من ساگه جره دمه
چان ايضمدوله اصواب -- وعنه خففوا همه
ظيمه اچبير -- شلون ايصير -- وحده ولا من ايعينه
-------
وحده بالسجن وحده -- ومن فوگه المنيه اتحوم
ياهو اللي يخبَر اهله -- ومن طيبه يجوه هاليوم
راد ابنه الرضا ايودعه -- ويشوفه شكثر مهموم
الكاظم يدري بس هاليل -- وباچر بالسجن مسموم
عگب صبره -- ختم عمره -- وين ابنه الرضا وينه
--------
وين ابنه الرضا ايحضره -- وللكاظم يجي ايودعه
وقيد القَيد الكاظم -- من ايده الرضا اينزعه
وبيده ايغمض اعيونه -- ولمصابه يهل دمعه
ايغسله ايچفنه وينعاه -- ويحمل نعشه ويشيعه
يجي ينعاه -- وكلنه اوياه -- ويظل الحزن بينه
----
سيد عدنان الحمامي
رد مع اقتباس
المشاركة الأصلية كتبت بواسطة ♡هبة الله♡
