مساجلتي مع الشاعر المبدع حسين الساعديالشاعر حسين الساعدي
بلمحكمه ومتهوم وشماتي الشهود
والقاضي يطلب ثار واكبالي موجود!
ـــــــــــــــــــــــــ ــــــــــــــــــــــــ
الشاعر محمد هاشم ألحسناوي
لاتنسه كل مظلوم الله اليعينه
لو كعدوا الشمات والقاضي بينه
***
الشاعر حسين الساعدي
بس صعبه من اتصير شماتك اشهود
وانته ابوكفتك هاي ومقيد اقيود
***
الشاعر محمد هاشم ألحسناوي
لاتهمك الشمات والقاضي والناس
بالصعبة أعرفك زين مدنك الرأس
***
الشاعر حسين الساعدي
لو دنكت هالراس جا هسه حاكم
مو متهم محكوم وسط المحاكم
***
الشاعر محمد هاشم ألحسناوي
انقض حكم هل يوم وتميز أهواي
بلجت محامي زين ويطلعك ابهاي
***
الشاعر حسين الساعدي
حته المحامي ايكول لا ماني فاضي
لو جبته ضدي ايصير وبحرضه قاضي
***
الشاعر محمد هاشم ألحسناوي
منهو الشهد وجكَال وصفلي رسمه
والقاضي كلي امنين ونطيني اسمه
***
الشاعر حسين الساعدي
سمه الوكت واشهود دنيه اويه الايام
شافوني احب الناس كالولي اعدام
***
الشاعر محمد هاشم ألحسناوي
لا تحزن انته اهواي وتردد ألاه
بالجت عفو ينطون ويشملك وياه
***
الشاعر حسين الساعدي
حكموني بعدامين هذا الله شاهد
بلعفو واحد طاح بس باقي واحد
***
الشاعر محمد هاشم ألحسناوي
الفرج لاتنساه وتئيس الحال
أمر الله بالحظات لو لفو أحبال
***
الشاعر حسين الساعدي
ما منقهر من هاي دام الله موجود
بس الصديق الكام صفك للشهود
***
الشاعر محمد هاشم ألحسناوي
اشعنده قاضي وياك متحزم حزام
بالجلسة شد وياك يدور إعدام
***
الشاعر حسين الساعدي
وصه الشهود ابساع فوك افتراءه
يعني الحكم معروف ماكو براءه
***
الشاعر محمد هاشم ألحسناوي
صعبة قضيتك ليش ماترهم حلول
نوبه المحامي وياك لايحجي ويكول
***
الشاعر حسين الساعدي
هالقاضي هذا اوياي ناصب عداوه
عنده الحكم بلموت مثل الحلاوه
***
الشاعر محمد هاشم ألحسناوي
متأكد انته زين هذا المحامي
لايغرك المكتوب بالقطعة أسامي
***
الشاعر حسين الساعدي
ما مرلي حته وشاف شنهي القضيه
كالالي باحسن حال تلكه المنيه
***
الشاعر محمد هاشم ألحسناوي
ادري الشماته انذال يبن السواعد
لجن دكلي اشبيه الجبته شاهد
***
الشاعر حسين الساعدي
ما جبت كل اشهود وبكل سهوله
القاضي يطلب ثار ولد اخته ذوله