الناقد, البغدادي
منقول عن طريق الناقد يحيى كاظم البغدادي
كاظم اسماعيل
ياجرحي يالملتهب كرص بروحي وصل
والله ملزم سره بدكتور لواكص وصل
فكيت باب الجرح ولكيت عكرب وصل
لولايتي جيت وادري بجيتي واجبه
لو ازحف ازحوف اطي للعرس واجبه
يلما تكطعون ما نكطع وياكم وصل
------
{ناصر اسماعيل الموزاني}
يالي بگلبك علي شوك وحسبته ورد
شما تبت من عشرتك يجبرني گلبي ورد
غراك بيه العطش والماي عندك ورد
ما اضوگ مايك بعد لو صار مايك حيه
والعنده عزت نفس لابد وعنده حيه
ارضه انه بموتتي ومارضه منك حيه
ولا تظن يوم انجبر بعد الجرالي ورد
-----
{كاظم اسماعيل گاطع}
هل من منازل صحت ولا واحد طلع نازله
والناس عد رغبته دهري اصبحت نازله
حبل الموده انكطع والبير دك نازله
غربه وندور بفلك ما النه بالحي نزل
ما حسبينه فرد يوم بدربنه نزل
هو صفاله الملك واحنه صفينه نزل
والدنيه بيع وشره واسعارها نازله
-----
{ناصر اسماعيل الموزاني}
ياصاح كثره الزلم الي حچيها هوى
ونادر تلا گيه الصادق في لسانه هوى
اشچم عزيز النفس بعد المعالي هوى
وشچم رذيل ارتفع فوگ الثريه عبر
طلگها دنياك واخذ من التجارب عبر
مهما الفرح دام لابد ما تصب العبر
معروفه دنياك ناعور ويدور بهوى
-------
{كاظم اسماعيل كاطع}
اصل الشفايف عسل واصل العسل منتمر
حته بعذابك حلو كلك حلو منتمر
ازرع ادروبك ورد ويخضرن من تمر
كون اوصل لرگبتك واندگ عليها وشم
وبخدك اگضي عمر بين الوايح وشم
يا اجمل الناس يحبيب وطيب وشم
بس نعتب اعليك مدك بابنا من تمر
-------
{ناصر اسماعيل الموزاني}
طعم الشفايف شهد ونبع الشهد من نحل
ما ينوصف لك جسد والجسد مني نحل
لا لاگي منك وعد ولا صح الي مني حل
مابين عل وعسى ضليت اگولن تمر
بالريج ضنتي عسل ثاريك حنظل تمر
من چان وكتي حلو بيدي اوكلك تمر
ومن لعب بيه الدهر بيدك لسع من نحل
------
{كاظم اسماعي كاطع}
يادنيه عوفچ صحت عف الله عما سلف
منكم جرحنا فرد منا جرحتو سلف
مديت ليهم ايدي كالو زمانك سلف
والمسرحيه انتهت بس منتهى فصلي
حتى اخوتي وقعو كلهم على فصلي
شيخ العشيره حلف ما يكعد بفصلي
بالفصل محد دفع سولي ربعي سلف
------
{ناصر اسماعيل الموزاني}
انساها لتحير دنيانه طبعها حير --حيره
مثل الطفل نام هنيالك يضمك حير-- حجر الام
الذهب معروف يلمع لا تضنه حير--حجر
ولو حار الانسان ينصاب بمتاعب ورق
طلگها دنياك كلشي الي عليها ورق
حبل الوفه صار چن حبل العناكب ورق
متغيره الگلوب غيرها زمانك حير
------
{كاظم اسماعيل كاطع}
لو ادري بالروح تضعف في هواك وترك
ماجان صار الهجر وياه برود وترك
صعبه اساله هل الزمن ما خله بيهن ترك
حتى الحشا ذاب من هجرك غدا مو حشه
يالعفتني بليل ودروب العمر موحشه
ضليت اسب بيك منعوني وكلت مو حشه
مو عربي ونخاك اهلك لو عجم لو ترك
{ناصر اسماعيل الموزاني}
بين عليه التعب دهري تعده وعبر
وهمومي عنده فرح وافراحي عنده عبر
ما تبت منه ابد ما خذت منه عبر
من حيث ذاب الگلب والحيل مني هوى
ووعود وصله وهم كلها سراب وهوى
ضنيته مثلي وفي چذاب ثاري هوى
سبيت بيه الزمن وصبت عيوني عبر
الناقد
يحيى كاظم البغدادي
رد مع اقتباس
