جرب صيح حيهم ها عراقيين
كد مابي نفط غيرة زلمنه البي
وطن ينبع زلم ماتعرف اجامل
تصعد عالمنيه وتهد متن الموت
ماعدنه زلم تسكت على العايل
جرب صيح حيهم ها عراقيين
البطن اميه يفزع ماتضل حامل
خاف الليل غثك يعصرون الليل
تلكه الليل حته من الفلك شايل
الفزع والفزع والغيره بالصوبين
روح اسأل علينه انكون ماسأل
طب اعله المكابر وانشد الميتين
يم عالم البرزخ صيتهم واصل
حيدر كل جنين يزوره من يصير
بذرة غيره بينه بكل كلب شاتل
علي مجندل زلم من زلم مو نسوان
شيهزه الي حيدر بالكلب شايل
مايلبس درع واحدنه من يثور
يحط بصدره روحه ويطلع يقاتل
طبع عدنه اليموت يموت حته يعيش
موش يعيش ميت بي نفس كاتل
هيله اعله الضهر لوتلكه فشكة خوف
مانكتل ضهر كتل الضهر باطل
بنادقنه مثلنه وتختلف عالناس
ماتاكل فشك لا بالبشر تاكل
تهوسلي السواتر من يمر طرواي
انه ويه السواتر شارب وماكل
معزب والارض ماكفت الخطار
البحر مديته سفره وفارش الساحل
جنت اكره كبل لعبة الختيلان
احس البيهه يختل بي جبن شايل
الوياهم كبل جنت العب يختلون
وانه البيهم احرك عمري ماخاتل
هنا باخر معارك روسكم جواي
بس ردت استراح انطيتكم فاصل
اهنا مصنع الغيره الباقي كل تجميع
الباقي الدول كل الصنع فاشل
عالموت نتسابق ويه ملك الموت
متفرزن البنه ارواحكم شايل
.................................................. ....
حسين الطليباوي
رد مع اقتباس
