يبت ذاك السلف مليت خل باجر هوانا يطش
ونتلگه النوارس ماي وبحضن السلف نفرش
وفرفحلج رفيف زنود بطيوفي
واتسرسح على عثوگچ ونوش البرحي بجفوفي
يبت ذاك السلف مليت خل نتصالح وي بليس
عشگ العفة گلتي يفيد چا ما فاد ليلى وقيس
خل نوزع عشگ للعگدو اگذلهم
ونتمرجح غجر وي ليل وانا وطولچ اولهم
وگودنچ للمگير وروح وياچ ماودعچ
خاف ارجع سوالف ليل وكسر خاطر صورّج
حدر فَيِ العنب لو نام ماسلطن بعد للعود
واتشلبة بوكاحة عين وتناوش ضوة العنگود
كافي نعيش مضمومين وانا وياچ ثلمة روح
خل تدري عشگنا الناس شمحلاته العشـگ مفـضوح
خل انطر السلف وكحين عود الناس خلها تشوف
ملينا المغامز بوگ ومشامر رسايل خوف
اريدن ماي من ثغرچ اريد ارجع صدگ مخمور
الغصن لو طاح يكسر خاطر العصفور
ويجبر خاطر التنور
وانا وطولج وحجي ابليس هم انطيح غاد متانيتنا گبور
يوردية العشگ موهيج نتواكح بسد اليل ونصبح عشك مستور
يوردية العشگ موعيب الگصب يغفة اعله طاري الهور
يوردية عالشاطي الماي خل نضفر گصيبتنا
يورديه السلف يرتاح من يدري بفضيحتنا
لبديج اعله طولي عثوگ وذبحها اعله جبلتنا
يوردية الستر مودوم اليعشگ دوم مايقنع
وانا بروحي عشگ ممذور يكتلني اليجي مرصع.
يوردية تره اليتناوش العنگود مايشبع
يبت ذاك السلف والطير مايرتاح اذا موعش
يبت ذاك السلف مليت خل باجر هوانا يطش
عقيل العامري
رد مع اقتباس
المشاركة الأصلية كتبت بواسطة اميره بااحساسي
