شمالك يا وطن شو وجهك اصفر ليش .!
ابو النهرين إنته شبيك مو راوي
حقّك وجهك اصفر حقّك إنته تخاف
چفوف اهلك لونّك بعد شتلاوي
ومو زرقاوي واحد يا عراق اذّاك
ثلث ترباع شعبك هوة زرقـاوي
ومو وضع الشعب مأساوي لا والله
بس هوة الشعب مخلوق مأساوي
وگالوا مو سوة والشعب موديلات
گلّبت الشعب نص الشعب عـاوي
يالتصلّي تحوسم ليش
لنّة يگول احوسم مستحب بس كون سكتاوي
ويگلّي إنما الاعمالُ بالنيّات
وانا صح حوسمت .. بس ما چنت ناوي
ويگلّي حوسمت بس حوسمت مجبور
وعلى الأحوط وجوباً چي چنت داوي ..!!
وهسّه إنته مو داوي بفضل الامريكان
بس هسه اندست بالجيّة والروحه
شنهي الفايده يا شعب تصعد فوگ ..!
وعزّة نفسك اعلى الگاع مطروحه
وشنهي الفايدة بيدك الف قنّاص
وما تعرف منو اليستاهل اتلوحه ..!!
يالسمّونه ولد الملحة آنا وياك
صارت ماصخة چا وين الملوحـة
اذا رايد بحث ذلّ ونفاق وبوگ
من هذا الشعب اخذ احسن اطروحه
هم شايف شعب من عمرة ظل ايبوگ .!
مجروح ويدور الدوة امن اجروحه
ربّك عنده لوح ايسجّل المهموم
بس هذا الشعب ما سجله بلوحه
اطفال اهواي متمرجحوا يوم العيد
والدهم طلع بايگ المرجــوحه
رد مع اقتباس
المشاركة الأصلية كتبت بواسطة غريب الروح
