هنا

[وحده من الناس]

نعم ابناء المحافظات غريبين الاطوار وكانه جايين من كوكب ثاني وما يعرفون يتصرفون اي تصرف

طبعا هدا مو كلامي ... كلام كثير من ابناء العاصمه وخاصة طبقة الشباب



طبعا انا من محافظة واسط وافتخر بهدا الشي بس مع الاسف هواي انقهر من اشوف ابناء العاصمه ينتقصون من ابناء المحافظات ...انا لاحظت هدا الشي بالجامعه وبالقسم الداخلي وحتى بالاماكن العامه

بصراحه...انا حبه اتناقش وياكم بهدا الموضوع واريد اعرف بالتحديد ليش هاي الفكره السيئه عن ابناء المحافظات

اتمنى يشاركنه بالنقاش من ابناء العاصمه حتى نتعرف على وجهة نظرهم



انتظركم اصدقائي

[علي سالم]

الموضوع انفتح وال يحب يناقش الموضوع خل يتفضل

[Samer]

شكرا على الموضوع وحدة من الناس ..


اول شي .. هذه الحالة جانت موجودة سابقا يعني بعهد صدام ... لأن (بزود أبو عداي) . جانت العاصمة مدينة راقية .. و المحافظات كلش تعبانة .. و تعاني من الفقر و غياب الخدمات و انقطاع الكهرباء .. و كل هذا بسبب صدام .. اللي كان يصب الخير صب على بغداد .. بينما المحافظات كانت في اسوء حال

.. أما بعد التحرير كما يسمى .. اختلفت الأمور .. و صارت العاصمة حاليا من أكثر مناطق العراق خطورة من الناحية الأمنية .. و غياب الخدمات عنها .. و ازدحام طرقاتها بسبب السيطرات .. مقابل ازدهار المحافظات بسبب مستوى الأمان العالي فيها

سواء قبل أو بعد .. اللي يحاول ينتقص من الأخرين بسبب كونهم من كذا محافظة أو منطقة أو بسبب فقرة أو دخله أو سيارته أو وظيفته .. هو يعاني اصلا من إحساس بالنقص .. و يحاول يعوضه عن طريق هذا الانتقاص

ماكو داعي للتكبر .. أو الإحساس بالزهو على امور هي تافهة أصلا .. و مو دايمة ..مثل المنطقة و المنصب و المال ... .. ممكن في اي لحظة تختفي من حياة الشخص بسبب ظرف معين بدون اي تدخل من عنده .. مثل ما اجتي هي اصلا ..بدون تدخل من عنده

و ميزان التفاضل .... هي الأخلاق و نقاء السريرة

شكرا وحدة من الناس على الموضوع .. و إلج تقييم

[troy]

السلام عليكم

على العكس تماما فأبناء العاصمة غريبين الاطوار وهذا الذي ادركته بعد مخالطتهم خارج العراق فهنا الكثيرين من العراقيين منهم من الحافظات ومنهم من ابناء بغداد وبعد ان اختلطت بهم وبعد المعاشرة تبين ان الكثير وليس الكل طبعا من ابناء العاصمة هم المغرورين بأنفسهم عن لا شئ مع احترامي الشديد للناس الاطياب منهم ولكن صدقوني الاكثر منهم لا يعجبه العجب ولا تكفيه حتى امريكا وما وصلت له من تطور تجدين ابن بغداد يستهزء بهذا وبذاك وكأنه من القمر وتسأله عن تحصيله العلمي فيقول اعداديه والقليل منهم من يصدق فالكثيرين منهم يقول انا وصلت في المرحلة كذا من كلية كذا وتركتها لسء الاوضاع طبعا بالزمن السابق والان وكمثال لي صديق هنا يقول انا مرحلة ثالثة من كلية العلوم السياسية وتركتها لسوء الاوضاع وبعد فترة طرح موضوع قصة تاجر البندقية اما مجموعه من الاصدقاء وطبعا كان جالسا فلما سالته عن ذلك قال ماذا؟؟؟ لا اعرفها ؟؟؟ قلت له كيف وانت طالب مرحلة ثالثة علوم سياسيه اتعرفون ماذا قال ؟ نحن لم ندرس هذا في المرحلة السادسة يمكن الغت بخخخخخخخخخخ علما انه من مواليد 1987 ومن ابناء العاصمة بغداد فمن هو غريب الاطوار؟؟؟؟؟؟؟

[fairy touch]

السلام عليكم :
اول شي ..بالنسبة للاخ تروي ..دا الاحظ انه نهجه ياخذ شخص او ثنين ويقيس عليهم ..يا اخي بكل مكان اكو الصالح والطالح والصالح في كل مكان قليل مو بس هسة ..لاااا..من زمااان ..

الموضوع اللي الاخت طرحته واللي كلنا ملاحظيه ..يكون الاغلب وسط الطلاب في جامعات العاصمة ...اغلب طلاب المحافظات يميلون للتكتل وما يختلطون بأهل المدينة ...طبعا لو اهل المدينة خلوا نفسهم بمكان الضيوف كان عرفوا انه اكو شعور بالغربة والمكان الجديد اللي ممكن يكون طباع المجتمع بيه تختلف رح تخللي الضيوف منكمشين على انفسهم وهذا الشي يحتاج جهد حتى الانسان يتغلب عليه ..بس مع الاسف الطرفين يبدو راضين بالحاجز .
.العواصم الادارية والتجارية مثال الموانئ(كالبصرة مثلا) دائما مجتمعاتها تكون منفتحة على الثقافات الخارجية اكثر من بقية مدن البلد..وهذا موجود باغلب بلدان العالم ..واهلها يكونون بتعبيرنا (سبورت) اكثر ...طلاب المدن الاخرى رح يكونون مشبعين بتقاليدهم ومتمسكين بيها وربما ينتقدون طباع اهل العاصمة ومتعجبهم ..ومن حقهم ..ولذا نشوفهم ما يعجبهم يختلطون ونشوف طلاب جايين من محافظات مختلفة يتعارفون اسرع من التعارف بينهم وبين طلاب العاصمة ..اكيد ايضا اكو نظرة مسبقة انه طلاب العاصمة اللي هم عالاغلب اكثرية ..وناس تعرف ناس و الولد يختلطون بسهولة وية البنات والعكس صحيح ..فممكن اكو اعتقاد عند الطالب الضيف انه هالنماذج متعالية ومراح تتقبله ..فما يتقرب منهم وبنفس الوقت ما يبذل جهد انه يغير هالنظرة ..يعني قابل اهل بغداد مو بشر وعراقيين والهم اهل و ولد وبنات عوائل و يتصادقون و يختارون الانسان على شخصيته ..ناس عاديين بس تصرفاتهم احيانا منفتحة اكثر ..وربما يبدو غالبيتهم ماديا مرتاحين وخاصة بالكليات اللي تحتاج صرف ..لكن اكيد اكو طلاب سباع وواثقين من نفسهم من المحافظات عرفوا يخترقون هالحاجز الوهمي ويكونون صداقات راقية وية طلاب من بغداد ..
وبالمناسبة اني لما كنت طالبة مستحيل اكدر اتخيل انه اخترق مجموعة مترابطة لبنات جايين من المحافظات وساكنين بالدار ويكعدون ويروحون وييجون ويقرون وياكلون وينامون سوا ..لا همة يريدوني ولا اجرؤ اني ان اخطف وحدة منهم واخليها صديقتي ..صارت مرة كدامي تجربة لبنت وكل اللي حصلته انه ضيعت المشيتين لا بقت وية صديقتها اللي تركتها لأجل بنت حبت تكون صديقتها المقربة وهي من احدى المحافظات .وببساطة صديقاتها حاربوها بكل الاشكال ...

الخلاصة ..اكو خلل ..والطرفين مسؤولين عنه ...
وكلما كان الانسان راقي من داخله كلما كان اسهل عليه انه يتقبل الطرف الاخر بكل ما هو عليه ..حتى لو كان مختلف ..والاختلاف موجود ...وعمره ما كان عيب ولا شي غريب ولا يجعل طرف افضل من طرف .

لكم التحية ...وشكرا وحدة من الناس.

[troy]

العفو انا لم اقل الكل وانما قلت الاغلب منهم وقلت ايضا مع احترامي الشديد للناس الطيبين منهم وهذا ما عرفته منهم من خلال معاشرتي لهم سواء في العراق او هنا خارج العراق عموما انا لا تعجبني تصرفاتهم واعتقد ان هذا من وجهة نظري الخاصة

شكرا