هنا

[جْــيْــكـــي'ۦ، 'ۦ]

تغيب الروح بغيابك واردها
كتاب جفاك من عندك وردها
روحي بفركتك يذبل وردها
شمس انت وتنور الدرب ليه


تلوعنة وشفنه كل حلاوتهم ومرهم
والروح تمشي على طوعهم وأمرهم
حبيبي دوه لجروحي ومرهم
تمنيته يجي ويحن عليه


همت وانسلب عكلي وزاد مرضاي
على المر ماشفت شخصة مر ضاي
لون بات الترف بحشاي مرضاي
لكه اكرب يهل مبعد علية


بسك لا تضل تشكي بهاماك
وتلوم العين وتعضعض بهاماك
اخذ طبع النخل وارفع بهاماك
واذا بالطين عركك هاي هية

لو ردت الحبيب اتشوفه ينشــــــاف
وطيبلك جرح بضــــــــماده ينشـاف
اخبرك بل حبيب اشلون ينشـــــــاف
بس ضيف الاميل وهاي هيــــه

سماح اطلب انا المنكم وهدنــــه
كمش بيد التعورنه وهدنــــــــه
جبل راكَع خجل جيتك وهدنـــــــه
اصير اتراب ونته اسحكَ عليه


وحك رمضان وأشرافه وكتبه
عليك يهل دمع عيني وكتبه
انه شماريد أهم خطك واكتبه
شدهني جفاك من غصبن عليه

وحگ اعيونك ورسمك وداعك
وحگ جلماتك الحلوه وداعك
يصاحب فرهَد ابروحي وداعك
انتلف ثلثين والباقي باذيه


عجب خلخال ساكك مايرنش
جبح ودموع عينك مايرنش
يرن منك مصايب مايرنش
كرهتك لوحياة تصير اليه


تعال اسمع ون النايات وون عود
يخويه امشي نرد للوطن ونعود
اذا باجر متت بالغربه ون عود
وتظل ابعيد عن ارض الوطيه

روحي من الهجر عجزت ولابت
حلفت بدار ماأنزل ولا بيت
ذكرك مابقى ب***ي ولا بد
انكطعت من كطعت الوصل بية

تلوج الروح ياأحبــابي وراكم
وعجاج الضعن سد عيني وراكَم
يدمرني الحلم بيكم وراكم
ويريت الحلم واليقــضه سويه.


وسط گلبي يظل طابع وسمهه
عسل صافي حلو مرهاوسمهه
صفيت متيه باسمي وسمهه
لان هيه النجم واني الثريه



الدنيا خلافك وحشه ومره
ولا منك بعد جيه ومره
صورك مره اضمنها ومره
اشوفنها توج نيران بيه


احبة وما احب واحد بدالة
وياذنب البدة مني وبدالة
الك منصوب بكليبي بدالة
خطك على النبض يشتغل بية

باقي ويالبذات والماله جاره
صدكوني جاجنيت لوما الجكاره



ياوكت خله الذيب يشاور ارانب
واصبح عراقي اليوم يحكمونه اجانب



الكلب بجفاك فاض من العيون
مو حب طبيعي اهواك بيك انه مجنون



رحم الله امك حيل جابت حليبك
ممكن امون عليك، واصبح حبيبك



أنت الگلب والروح وانت المحنة
والگلب لوينساك أتبرة مننه



يم بيتي ريتك كون واشمرلك العين
تشبعلي منك شوف وتردها بعدين



لو فد سباق يصير ياهو أجمل الناس
وانرش عليك أتراب هم تاخذ الكاس



اتمنه هسه وياك واكعد وحاجيك
وبيه الدمع بلعين يهيج بواجيك



بسته ثلاث بوسات ماجاني بسته
وطعم العسل يااحباب بالشفه ضكته



بسته وحلات البوس بعد التجافي
وكلبي على البوسات يحسد شفافي



ما ناسي والينساك ما عنده خوة
بس الزمن مرات يلهيني كوة



أمسح جرح سيال ينزف الثاني
تقبل تضل فرحان وابقة أنة أعاني



شعر وقصايد بيك صرت أكتب أني
متكللي هم الفراك من وين أجاني



جك جك تطيح الناس بس آنه طباه
اسم الله محد كال كالولي وجعاه



من عيني اطلع الماي واكتب على الروح
اجمل بطاقة عيد لعيونك تروح



هم قصف هم قناص هم شهر حاسم
جا وين اودي هواي من نهر جاسم


اسال علیکم دوم کل فکری یمکم
هذا الزمن غدار باعدنی عنکم


حلوة وعليهة اعيون مثل الغزالة
والشعر لون الليل والخد هلالة



من كثر تعب الروح ما تگدر اتصيح
شايلهة بيدي اشيول بس اغفل اتطيح



جتفت روحي جتاف كل ظني تنساك
من روحي طلعت روح كالتلك أهواك



للجنة اهدي الروح ولكل الاعضاء
واهدي عبير الشوق للحلوة اسماء



ما انسى اني اهواى لوطلقة بالراس
جوة القبر ذكراه تنطيني انفاس


لعيونج الحلوات ارسل بريدي
ولشوفتج اسماء اكطع وريدي



لو عددت العزاز لاترفع ايدك
هيه المعزه اتكوم وتكول اريدك


ياخوية شنهو الصار وشنهي القضية
ليش من ادك عليك مترد علية



يالتسأل على عبيد ماكو بحلاته
من كد جمال عبيد ضاعت صفاته



ريت الله لا ينطيك يالصحت بسمة
فز فزت العصفور كلبي شيلزمة



بكلبي ماناسيك وبفكري كل ساع
وروحي اذا تنساك اركعها بل كاع



صابر اضل للموت بس كون اشوفك
تدري انت كلش زين مابية اعوفك
　

صرت إنت وبدنياي صرت إنت كلشي
والدنيا وبلياك ما تسوى كلشي



ما نمت طول اليل حلف المخدة
الدمع صاير سيل للركبة حدة



هاك اخذ كلبي وياك حطه على صدرك
خاف الفراك يطول هو اليذكرك





أنسه المضه والراح ماريد أشوفك
حجيك جذب ياحيف أنه أرد أعوفك

عيدين الك هليت فطر وضحيه
يالبيك الف عاشور مراً علي



كلماتي مو اشعار كلماتي تاريخ
ومن افتح الشفتين تطلع صواريخ


خايب ونيني عليك جا ماله حوبه
صاروا فريق عداي وصرت انه طوبه
_____________________________

عيد ودمع وجروح يلتمن شلون؟؟ *** كلما اگول انساک تفضحني لعيون

تدري انه گبل العيد عاشورك وياي *** حاسمهه لو مو عيد ماتضحك اشفاي

گالولي اجاك العيد چا ليمت تهيد؟؟ *** عيد اليمر بجفاك ماينحسب عيد
ميرجع الميتين و ميرجع الراح *** بس من تهمل العينين الگلب يرتاح
ليش انت وياي دوم ماعندك انصاف ***قلبك صخر جلمود من الله ماتخاف
من دجله اريد ارويك ومن ماي العيون ***كول وبعد شتريد هم آني ممنون
يمتى الغيوم تزول عن سما بلادي *** وآخذ نفس وارتاح وانزع سوادي
خاف الله يالمريت ما كلمتني*** ليتك حجيت وياي لو شتمتني
خلت القلب ينساك ساعات الفراك***ثاري ال*** جذاب بس شافك اشتاق
متعجبه هالنسوان براغب علامه *** داخل حسن يسواه ويسوى عمامه
فدوه الرصيد يروح وشلون اعوفك
هاك اخذ هاي الروح بس كون أشوفك
**********************
مجبور أدوس أرقام تجبرني أيدي
كلبي اخلصة عليك مو بس رصيدي
***********************
بين الكلب والروح هناك أخليك
واكتب خطر ممنوع محد يمر بيك
********************
روحي بسرير الموت تنشدني عنك
تكلي ليش هواك متبري منك
********************
ما أزعل علة ألصار حبة بوريدي
لاكن صفر دولار صدك رصيدي
**********************
شنهو السبب تعبان لو زاعلتني
مرتين أدك عليك ما جاوبتني
********************
بفركتك إنا الماي سم من اشربه
وكل ساعة من فركاك احسبه غربه
*********************
انته السما الفوكاي وانته نجمها
والروح أذا تنساك صدكني اسمها
********************
زيد بغرورك علية استأهل إنا هواي
ياريت شكلك حلو جنك مرة بباي
*********************
ريتك تدك مسكول وتفرح الروح
ولو مسج يل محبوب تشفيلي الجروح
*******************
صاير جلف يهواي وسفه وحرامات
ياهو الأخذ وياه للكبر سنتات
******************
جاهل وأعرفك زين متحمل عتاب
خلينه عالموبايل لا توصل الباب
*******************
ريت وألف ياريت ترسل رسالة
للكلبة بيك احتار ونشده حاله
*******************
لا تظن يوم أنساك واتبرة منك
صدكني بس الموت يبعدني عنك
******************
إرهابي ليش تصير مو انته حباب
فجرت كلبي ولك سويته عطاب
*********************
سألت القلب من أغلى من الروح ؟؟
قال اكتب رسالة وشوف وين تروح
======================
لا تضن يوم انساك وبتعد عنك *** تدري الكلب
يهواك من زغر سنك

لو ردت اعد اعزاز لاترفع ايدك *** هيه المعزه اتكوم وتكول اريدك

لاتكطعاترجاك سمعنيكلمة *** والله الهوة بلياك

مايسوى اشمةصاير طبعبالناس تنسى اليبعدون *** بس انا ما انساك لو تعمة لعيون

نص روحي اخذها وياك لا والله كلها***من فدوة الك هالروح هي واهلها
كل فرحه سهله تصير وانساهه وتهون … بس فركتج تيزان وطاح بالعيون
حذت الجدر للماي ورديته خالي .. من جابوا اسمك هواي انشده بالي
كلما اكول انساك وارجع واذكرك … مو بالعظيم ويطيب بالكلب كسرك
من كلبي كص لحمات لو مسك الجوع … لو مالكيت اشياش شيش بل الاظلوع
ارد انشدك يفلان يل بلهوى استاد … تكدر تخيط لااجروح ما الهن اضماد
صدك حبيب الروح مشتاق اظمك صح امشي بين الناس ورحي يمك
لا صكر لا غزلان شايل علعيون … من شفتك اختليت , صرت انه مجنون
سبحانه من سواك نص وجهك اعيون .. ازغير سبيت الناس من تكبر شلون
حبيت انا يا ناس حرة ابية .. لما سألت الناس كلولي عراقية
دمعي يجري عليك يأغلى الاحباب … والكلب شنهي ادواه من شافك انصاب
اضحك يا بعد الناس اضحك يا حبي … صوتك شحن واحساس مالك الكلبي
وشحجي وتريد الناس من عندي احجي … دمعتي ابطرف العين بس احجي ابجي

[رغد العراقية]

روووووووعــة

[علي الشمري]

شكراً
عاشت الايادي

[روح لاتعرف اليأس]

جك جك تطيح الناس بس آنه طباه
اسم الله محد كال كالولي وجعاه

هذا اكثر دارمي عجبني
يسلمو ع الطرح

[جْــيْــكـــي'ۦ، 'ۦ]

روووووووعــة

مرورج الاروع

[جْــيْــكـــي'ۦ، 'ۦ]

جك جك تطيح الناس بس آنه طباه
اسم الله محد كال كالولي وجعاه

هذا اكثر دارمي عجبني
يسلمو ع الطرح

ذوق حلو ^_^
نورتي

[جْــيْــكـــي'ۦ، 'ۦ]

شكراً
عاشت الايادي

عفواً نورت