درر العراق

علي الشمري · 5/April/2015

ها لمتنه ذيج بيوم جنا ازغار ..
تمرين بخيالي شما غفت عيني
تصحين الفرح يالمات وسط الروح
وتنشفين الدمع وترد تصب عيني
حزني بشوفتج كد الافراح البيج
يا اجمل ايامي واترف سنيني
ترديني لجنتي حظن ابوي الراح
وتفجعيني بخبر حركو بساتيني
يا صورة كبل مجبور اعاين بيج
بلجن للورة الوانج توصليني
بلجن عين ابوي تشوفني من بعيد
وبلجن طيف اخوي يمر طرف عيني
بلجي ارجع واشوفن لمة الاحباب

وبلجن للفرح لحظة ترديني
رافكت الحزن من طشرانه البين
وصارت بس دمع تكطر دواويني
يا صورة كبل صح بهت بيج اللون
ويكتلني الحزن لمن تمريني
بس ابقة احبج لان بيج وجوه
احباب الكلب بيهم تذكريني

للشاعر قاسم الطائي