قصــيدة يــاوطــن
يا وطن
يا وطن يل روحي بيك معلكه
مثل ثمره وشالهه غصن الشجر
من اتركنك اموت من العذاب
الوحشه تبرالي ودمعاتي مطر
انت روحي ومهجتي وضي العيون
وبيك اشجار الامل تحمل ثمر
انه عاشك وانت معشوكي واموت
لون عنك حدرت يوم بسفر
من اشم اترابك اجروحي تهيد
اجروح بعدك بالكلب تركت حفر
صحره عمري بغيرك مخضر سراب
وبيه بس شوك الحزن مد البصر
يا عراق العز يا رمز الاباء
الخوف باولادك ابد ماله أثر
العراقي ما يهاب الموت لو يكبل عليه
ما يفر منه وينطيه الظهر
يكله يا موت اقترب اهلا تعال
العيشه بالذل هيه موتي والقهر
بس شربنه ماي دجله والفرات
خضرت بينه الكرامه والفخر
احنه معروفين ابطال واسود
نخلي من دم العدو يجري نهر
انحول اتراب الوطن نار وشرار
لو اجه المحتل علينه واستقر
من علي وحسين اخذنه المرجله
اكلوبنه بالمعركه من ماس وحجر
سيوفنه ما يوم نامت بالاغماد
هيه بس تقبل ترى بغمد النحر
يا دواعش حان يوم الانتقام
نكلب الدنيه عليكم يا تتر
وين من عدنه تريدون الفرار
ما يضمكم منه بر ولا بحر
احنه ذبينه جثثكم للجلاب
استنكفت منكم وصدت بالنظر
من فضايحكم خجل حتى العار
استحه وغص بحسرته وانتحر
احنه اقسمنه نسويكم طحين
كال ابو عزره وصلكم هالخبر
رد مع اقتباس
المشاركة الأصلية كتبت بواسطة النقيب
