عشرتك دمعه
شلت عشرتك دمعه بعيني هل ايام
وين الله من اشوفك بلكت ابجيهه
تتنادس جروحي من يحل ملكاك
تبلس من تشوفك خلك راعيهه
ما تفرق ضحكتي وضحكت الجناز
انه وياك حته الضحكه ناسيهه
تتحزم اعيوني بدمع لو مريت
عالفطره وحكك ما موصيهه
فوك متوني ياخذ راحته التابوت
صبخه وثكل حملك ما يمض بيهه
عتبت بيتك اتمنيت عده السان
حته دكلك اشكد نايم اعليهه
ما حركت رمشك من مريت
وانه اشبك طعنتك من الاكيهه
الجكاير كحلت شفتي اعله حس طرواك
مرات اشتبه وعيوني اسميهه
هاي اسنيني بيدك موش طاست ماي
كل ما اديرلك ضهري تبديهه
عفتتني بنار ياهو الكلك براهيم
والكثر بلكواغد كمت تطفيهه
انه تمنيت تخطر مكبره اعله البال
حته ادفن ذكرتك ما الخليهه
عشرتي وياك عشرة سده ويه الماي
اجي بلهفتي وتدفعني ورد ليهه
لذب لومك اعله القسمه ولايام
انته الما ردتني القسمه شعليهه
لتغرك شمس تضحك لهذا وذاك
الغيمه اشما تغنتب تصحه تاليهه
الما عنده سكف ليعاند ويه الغيم
يستبرد مجرد يمر طاريهه
شكبر صيت البحر كضه العمر مطروح
وتسحكه الطيور بطرف رجليهه
احساسك مور كتلك ما يمر بي شوك
مثل صحره تشل اجفوف ساكيهه
طعناتك بضهري تمرجحن بلعيد
وكولن عيد زحمه اشلون ابجيهه
بس اليا وكت ابقه الهواك شراع
نسماتك تعيل وما احاجيهه
ابتديت من النهايه وياك بس ما فاد
اهل مكه تره ادره باهاليهه
غرفة صاحبك تشبه حضن سرداب
الله يساعدك وشولن كاضيهه
رد مع اقتباس
المشاركة الأصلية كتبت بواسطة ولاية علي
