راح اسافر
واترك اسنيني وراي
واطوي دفتر ذكرياتي
واحمل اهمومي اعله ظهري
واترك البستان والشط والنخل
واشلع النجمه ابسماي
خاف واحد يندل امچاني و يجي
ارد اشيلن گلبي من هذا النزل
ارد اعوفن دولة الحب
بيها مسموح القتل
بعد ميت زرع گلبي و مايخضر بي شتل
راح اسافر
واترك البيت البنيته
ابشعري واحلامي ودموعي
ارد اسدن باب گلبي
الما لمس ايد الاحبه
الضیعته الناس مني
و طفت ابهندس شموعي
راح أحطّ ابأرض مابیها غرام
حتي لا شوفن ابعيني
ينهدم بيت الحمام
والسلام
الشاعر:عبدالحسين الباوي
=====================
رد الشاعر القدير الاخ سيد حسن الشريفي على القصيدة
لا تسافر
دمعة العاشگ جریمه..اتهز امن ذیچ البلاد..
اهناک ممنوع الکلام وبین قوسین السکوت اکبر جهاد...
.آنه انصحک لاتسافر درب دیرتهم بعید..
اهناك عدهم شمس تحرگ ...
.حیل تحرگ وانته جسمک من جلید..
انته شایل ورده بیدک ....یا ورود الگصت ارگاب الحدید..
لا تسافر ..من تسافر ینذبح لون الامل ویه النشید ..
والنخل یلبس حداد وما یشوف ابعینه عید لا تسافر ...
لا تسافر ...
الشاعر: سيد حسن الشريفي
=======================
رد الدكتور عدنان غزي على القصيدة
انته حگک لو تسافر -
لو تغادر-
لو تهیم اولو عفت حتی البیادر-
ما الومک-
حیث مزروع ابأرض کلهه خناجر .
الدكتور عدنان غزي
=======================================
رد الشاعر القدير الاستاذ خالد ال ناصري على القصيدة
ما ألومك من تسافر
لأن عايش بالمآسي و بالمحن
لأن أحكام البراءه اتموت خضره و تندفن
لأن عصر البينه يمشي عصر غايص بالفتن
لأن عمر البينه يجري غابت أنواره و غزوها
و فرهدوها و الزمن ما هو الزمن
لأن ضحكات الأحبه العاشرونه اتنادسن و اتبدلن
لأن چلمات الطفوله اتغيرنو اتباعدن و اتناثرن
و اتخربصن و اتزانگن واتعاركن واتحاقدن...
و لأن عندي اهواي منها اشما گلت ما خلصن
.
.
.
بس أگلك لا تسافر
لأن بعيون الخلگ تبقي غريب
و لأن هذا الى تعوفه انته ، يسمونه
وطن
رد مع اقتباس
المشاركة الأصلية كتبت بواسطة sarah sona
