أنه اوياك!!
++++++
أنه اوياك واحد روحه بلثاني
لو حزنانه روحك هاجت أحزاني
وَشوفن دربي بعيونك
وأقرء اظنوني بظنونك
دورني إويه روحك راح تلكاني
وأنه اوياك
واحد روحه بلثاني
وأنه اوياك
مريم
........................................
ومن أشتاقلك يوميه أشوفنك
ورده اويه الورد وهناك أشمنك
عطرك يا عطر روحي
هَود لوعتي ونوحي
فَلاح ابغرامك وانته بستاني
وأنه اوياك
واحد روحه بلثاني
وأنه اوياك
ااالساعدي
................................
صار اسنين أفكر بيك ليليه
وِشكد ناس اجت ما أثرت بيه
عميه وما شفت غيرك
بس أنظر تصاويرك
وأعرفنك وَفي وما يوم تنساني
وأنه اوياك
واحد روحه بلثاني
وأنه اوياك
مريم
.....................................
يابسمه وأبد ما عافت اشفافي
يابو اعيون حلوه العشكت أاوصافي
ما حاجه أسئل اشلونك
أقرء الدنيا بعيونك
وأفتهمك حبيبي وكلبي دَلاني
وانه اوياك
واحد روحه بلثاني
وأنه اوياك
ااالساعدي
............................................
يا قيس ابزماني ولازم أشكيله
من هاي اليالي العذبن ليله
وبعناد اليلوموني
بيك امساهره اعيوني
لجلك بلسهر تتبدل ألواني
وأنه اوياك
واحد روحه بلثاني
وأنه اوياك
مريم
اليه الشرف بمساجلتك استاذي الساعدي
.......................................
أسولف للكمر عنِك وأسئلنه
والهمسات الك من روحي تتعنه
إوليليه ابسهر أنه
مو بس انتي سهرانه
لا نامت اعيونك لا غفيت اني
وأنه اوياك
واحد روحه بلثاني
وأنه اوياك
ااالساعدي
الشاعره مريم الفخر لروعتك التي تصنع الروائع
رد مع اقتباس
