وفاة الشاعر الكبير سعد محمد الحسن البهادلي
خبر عاجل
انتقل إلى رحمة الله الشاعر الكبير
سعد محمد حسن البهادلي في حادث
مؤسف اثر حريق في داخل منزله وتسبب بالاختناق
انا لله وانا اليه راجعون
من اشعاره
ياصاح كّـل للوكت زغلط دزور دغش
ولعيوب غيرك دغط دستر يصاحب دغش
خل حجيك ابيض كطن لا تخلي ابد بيه دغش
والماله جلمه ابد ماعده غيره وعرض
والرجل ما ينحسب مقياس طول وعرض
غم اليتاجر حجي والجلمه طلب وعرض
خل جلمتك جا العهد لمن تكض شاربك
وكيض الله خلصه بعطش كون الاخو شاربك
ظل انت حظ وبخت ما تندحك شاربك
ولو خوك حدر الشمس صير انت في وذرة
وجرح المكابر صبر فوك المعاند ذرة
عرنوص ذب الشلب سنبل حصاد الذرة
لو حيه صار الوكت صير انت له دفله
ولو خوك يومن برد وجروحك دفله
لايغشك الكاولي لمن خشب دفله
بالك تمس الجلب لو يوم جلبٍ مسك
بالموزمات الرجل لعنان غيضه مسك
شعواط لو ثعولو ظل انت فايح مسك
وخليه غميج الخلك جن خلك بحر القزم
وتدري الجبل ما شكه من دغدغنه القزم
الطول مو بالعلو تلكاهه طويل وقزم
ويصح كصير القزم بس جالجبل هامته
والدنيه لو مكبله ابدن ولا هامته
حيلن اصيل النزر ما تنخمد هامته
لا تعتمد عالنذل بس درت ظهرك نكت
من حيث لنه برخص لجتاف غيره نكت
عد روحه مرد ما يدري مكور نكت
لاتظن يوم النذل من تجفي ظهرك حمه
بس يوكدله لون تنور غيضك حمه
لا هو ابو المرجله لا هو اخو لا حمه
من حيث لن النذل ما تنبني عشره له
بالملكه عده وجه بس لصدك عشره له
بالطيب ماله سهم لا خمس لا عشره له
بس بالمخازي حصص تلكاله والله سهم
ما ساهم بغانمه بس بالرديه سهــم
لو صرت دركه انته اله تلكاه بظهرك سهم
من حيث لن النذل ما ينطلعله ظهر
لا تجفي وتامنه ضنتك يكضلك ظهر
رس النذاله عرك ممتد لسابع ظهر
والرجل صورة شرف جرجبه حظ وبخت
جلماته ماي وبرد النار المّوزه بخت
لا غره مال باخو ولا خوه باطل بخت
كسلان صار الوكت بدروسه كلهن سكط
حط كوره ويه الشهم ويعلي شان السكط
مايدري ساسه رمل بس لاحه ماي وسكط
وهمان جنح الشمس صوب الشمس من عله
ما طايرن من فرح بس طايرن من عله
لابد ويوم ويكع ويظل دهر من عله
زيزايه كصت النذل ما بيه كطرة حيه
وماتت هروش الخجل ماهرش بيهن حيه
تلكاهه ذيب الكلب والجلد ملمس حيه
غم الرجل يلبس حدر الملابس يلكـ
وبكل جحف جا الجلب بلسان غدره يلكـ
عالغيبه شابح جفن يالكـ عيونه يلكـ
لا تظن يوم النذل شارب الغيرة يرف
لاعده جف ينتخي لشكوك وكتك يرف
خل جود جفك بحر ماحده شاطي يرف
حنظن يدس النذل لــو غمستله سكر
يكيف على طيحتك يضحك لحد ما سكر
وأمن ضمير انجرح من كاس خمرن سكر
غم صاحب العاشرك وبصحبته عالدغش
لا تقفل قفل وتحسبه مامون
اذا ترهم عليه كومة مفاتيح
ولا تتبع اثر بخدود الرمال
اذا چانت مطر ومسودنه الريح
ولا تعاشر بشر وتورجه بسرار
اذا ماي الحياء بگصَّته شحيح
ولتعاتب نخل ماحمَّل عثوگ
خطية النخل برگاب الفلاليح
اذا مركب شله وحَب ايد الگياش
موصوچ النهر صوچ الملاليح
اذا شطك حطب وجروفه نيران
بعد تعتب عليمن علسوابيح؟
اذا جنحك شمع والشمس تتنخاك
موفشله لون ابابها اطيح
واذا كلك خشب وتصيحك النار
شحلاة الدم لون علموقف يسيح
العيد يجي بفرحة يوزع الناس
ونه حصتي التعب مثل المراجيح
من اصابعها يسيل الخير جروان
وتال البوه حصتها المراويح
ملح بعيونهن لا تغفه وتنام
لچن من تحترگ تغفه المصابيح
وعلى الماي العذب ماهادت بيوم
لچن حضن الوصل عيد التماسيح
وداعاً ايها الجبل الميساني فقدك العراق وميسان خصوصا رمزا للشعر الشعبي وداعا يامن خلدت لنفسك ذكرى فلن ينساك كل من قابلك وكل من سمعك فوداعا يا ابن ميسان
أنا لله وأنا اليه راجعون
رد مع اقتباس
