التحبها اشهور تطلعلك ( ولد )
افتحلي كلبك باب لو رايدني افوت
حتى اشمك نفس ونتظرك وعد
ولاتعبني بكلام الحب هذاك
وماادوخ راسي بشكال وقصد
معيدي (طك بطك) اريد اسمع هواك
لو احبك كول لو نخلص بعد
مال لازمني الخجل شحجي وشكول
وترتعش من تحجي لو ضغطك صعد
انا اريدا ياحريمه بمستحاك
ولحظة اعتابك احس ريل وحمد
مو تكلي بشوك (بس بس) مره (ميو )
مره باك المحفظه وصاحب شرد
والله خربتو العشك مابيه حلاه
مره تكتب( هارت) مرات الكبد
كبل جان الينعجب شايفها كون
صدفه جمعتهم اجه ويمها كعد
عالاقل سامع خبر خلاه يهيم
اوصاف بت افلان مابيهن عدد
هسه (اس ام اس) يخلصوها على كيف
وخطوه خطوه العشره تطور اشد
وهو لو باقي العشك عالتلفون
شواية الله بهاي وكليبي انسعد
صوت تسمع عالاقل يمكن حنين
ناعم ويغريك والراي انفكد
هسه عشك الفيس بوك داخل جديد
والكلام الزين الينومك رغد
ياهو التكضه يسولف عالجروح
ياهو جارحهم ولاتعرف ابد
يبدي حب (بعجاب) (تعليق )وسوال
هالجمال منين ومنين البلد ..؟
تدخل الصفحتها تقرى المعجزات
بالشموخ اتضاهي اشور واكد
الاقامه تكون في قلب الحبيب
والسكن مذكور من جد وجد
ونته تنشر عالغزل وعلى الحنان
تبينلها هواي بالحب مضطهد
وتالي ماتالي بعد ذاك الغرام
والتحبها اشهور تطلعلك ( ولد )
رد مع اقتباس
