هنا

[سجايا]

السلام عليكم ..

أسرد لكم هذه الحادثه اللي صارت بينا احنا مجموعه من الصديقات من مختلف المحافظات العراقيه
قبل 7 سنوات تقريبا ..بسنه من السنوات كنت بجامعة الموصل ..
كنا في الاقسام الداخليه عايشين ع الحلوه والمره رغم بُعد المحافظه عن محافظاتنا لكن كنا وكانه بالجنه ...
في وقت معين صارت ازمة نفط بالمحافظه فقطعوا عن طلاب الاقسام الداخليه النفط ...عادة اكو خزان بالقسم مانعرف وينه بصراحه بس احنا كنا نملي المدافئ عن طريق (حنفيه) نفط... بفتره كان البرد قااااسٍ جداً ... وصادفت امتحانات ... ولازم اكو نفط حتى نكعد نقره مثل العالم ... فرحنا واذا نفط ماكو ... المشرفه اللي لجأنا الها ..كالت باللهجه المصلاويه( مااعغف السبب ..)
المهم ... حاولنا مرارا وتكرارا الى ان اجه أمر من الرئاسه للمشرفه انه تختار بنات وياها يرحون يملون من كلية الهندسه (اللي داخل لجامعة الموصل يندل ) الهندسه قريبه من الرئاسه واللي الاقسام وراها تماما ..
المهم اختارت بنات حبابات اللي هن ( اني و7 من محافظات مختلفه كوت وناصريه وبصره وسماوه )
فطلعنا باليل والمشرفه ويانه بس نريد نكمل ونرجع.. فطلعنا بملابسنا بس ضفنا الحجاب والكوتات لان البرد كلش قوي كان..يعني اللي لابسه دشداشه وحجاب واللي لابسه تراك وحجاب المهم ... طلعنا وبيدنا كلنات الصوبات ..
المشرفه تمشي واحنا وراها لانه خايفين كونها اول مره نطلع بالليل .. فوي ما لفنا للهندسه واذا بالرمي والطلقات علينا بشكل موطبيعي... منين دتجي الطلقات مانعرف المهم ... طبعا حرس الرئاسه لحكونا ... وبدا الرمي من الجانبين واحنا بالنص ... وطبعا احنا صار الانبطاح مثير ..مانعرف طين ,تراب, مي ,,المهم كلنا اتجهنا لصوت المشرفه وهي تصيح(بناااات هوني هوني تعالوو ) بسد جدار بنايه اخرى ...وطبعا احنا راسنا بالكاع وايدينا عليه خوفا ..
الرمي مازال مستمر والحرس يركضون والامن وراهم ويبادلوهم الرمي واجهزة النداء مانعرف شكو..
بعده الرمي مستمر... سمعنا احد رجال الامن يصيحنا منا منا يا بنات ...احنا هم وره الرجل الى ان عبرنا وركض للقسم
دخلنا حديقة القسم واذا البنات صديقاتنا على صوت الرمي طالعين للحديقه (وطبعا كان ممنوع الخروج للحديقه ليلا ) بس طالعين لانه كالو احنا كلنا راح يجيبوكم جنازه ..طبعا الموقف لانحسد عليه ..
بالنهايه اجه رجل من أمن الجامعه ..اعتذر ..مانعرف ليش بس اكيد يعرف التقصير منهم .. وسألنا على الرمي
فاتضح انه جايتهم إخباريه انه اكو متسللين داخلين للجامعه ... فعبالهم احنا الارهابيين المتسللين ..!!!
ثاني يوم رجعنا من الكليه شفنا (تنكر النفط) ديترس الخزان ...
بس بالنسبه الي بقيت 3 ايام مااكدر امشي باتزان لانه الخوف والرهبه سلبت مني صحتي
وصديقتنا (ام السماوه ) اغمي عليها بنفس الليله الفجر ..لحد ثاني يوم الظهر يله استعدلت
وبعد ايام رحنا لنفس المكان وتابعنا الطريق منين عبرنا وشلون وصلنا ..تفاجأنا انه اكو حايط زغير او كأنه فاصل كونكريت
صفنا عليه وحده تكول للثانيه هذا شلون عبرناه ؟!!!!!
ولحد الان من تصير فرصه لقاء بيناتنا الصديقات لازم يصير حديث حول هذه الحادثه ..المرعبه
فمعقوله شكلي كإرهابيه ؟؟!!

[لانا احمد]

ههههههههههه .. اي طبعا" أرهابية
لأن أنا متأكدة طبيعة الملابس والوقت كل هاي الأمور راح تخلي الحراس يشكون بيكم بعيدا" عن الأخبارية بوجود متسللين
أحلى شي (أم السماوة) والله خطيه
الله يساعدكم .. قصة ممتعة وتستحق تقييم

[رجل كل العصور]

بصراحه ما اعغف كيف اعلق على ذلك الموقف الذى لاتحسدين عليه
التسلل الليلى .... هذا عواقبه
بس اتوقع ان الاخباريه بوجود متسلللين فى ذلك اليوم
كان مصدرها قسمكم الداخلى..
عبوركن الحائط الاسمنتى يدل على انكن طويلات جدا!!

قصه رائعه
شكرا لك

[سيد الاحرف]

ههههههههههههههههههه بصراحه كنت اتخيل الصوره المؤلمه والوضع الذي كنتم به وشبء اخر لابد ان يمتلك رجال الامن الحكمه قبل اطلاق النار واحتساب الظروف الحرجة على العموم
نحمد الله على سلامة ملاك الدرر

[Heaven]

والله ماعرف شسوي اضحك لو ابجي
الله يساعدجن شلون عدجن رجلين وركضتن اني لو مكانج اطيح بالكاع لحد ما الله يفرجها
قصه حلوه ومرّه شكرا ست هاوس
ومنو يدري يمكن ارهابيه تطلعين

[نـرٍجٍـس آلُِـمـوُسـوُي]

خطيه الله قدر ولطف همزين محد اتصاوبت
قصه مرعبه وممتعه
تقييم ♡

[علي الاسدي**]

اني كنت شاك بيج ارهابيه بس ما اكدر احجي لان نائب و النائب
عنده حصانه بس الحمد لله هسه عرفنه ههههههههههه

[محمد ألعبادي]

اني اعرف اليتسلل حرامي مو ارهابي
اذا اكو اخباريه بوجود متسللين راح يصير اطلاق نار بس اذا المتسلل وقف عاجز و رافع يده ماكو داعي يستمر اطلاق النار !

الحمد لله ع السلامه


بسلا يطلع الموضوع ملغم

[تشيللو]

الحاجة ام الاقتراع حتى مشفتن المي وتراب ههههههه بالانبطاح..
عمي الحمد لله ع السلامة ايتها الارهابيات ههههه
انا هم صارت بيه..من كنت بالبصرة ادرس هم هندسة قدرة كهربائية..
باحداث صولة الفرسان.. بيهه طالب اتوفه الله يرحمه..
شكرا ع القصة الارهابية ..

[سينشي كودو]

لو هيج مغامرة لو ما تنراد